Home Politica Lider di PDR ta yama na reflexion e partidonan envolvi den conflicto...

Lider di PDR ta yama na reflexion e partidonan envolvi den conflicto y no lague escala!

0
0
SHARE
- Advertisement -

ORANJESTAD (AAN) – Diamars mainta fraccion di Partido Democracia Real, a convoca su conferencia semanal di prensa, despues di un siman di ausencia di su lider mr. Andin Bikker, ken tabata na Hulanda en conexion cu e reunionnan di IPKO.

Den su prome tema, Parlamentario mr. Bikker ta mustra su preocupacion debi na e incidente cu a sosode Diadomingo cu a pasa, y e ta pidi ambos partido y gruponan concerni pa nan reflexiona, y no laga e asunto aki sigui escala.

Parlamentario mr. Bikker a subraya cu Aruba tin un democracia bibo, cu ta beneficia di un dialogo, y en todo caso respetando tur hende su derecho di expresa nan opinion.

No obstante, mr. Bikker ta considera cu esaki ta un momento di auto-reflexion di parti di Gobierno y Parlamento, pasobra el a presencia varios biaha reunionnan den Staten cu a baha nan nivel y a pasa den confrontacionnan similar, y a bay un tiki mas leu cu pushamento pero a bay casi den pelea den Parlamento.

E lider di PDR a acentua cu nan mester duna ehemplo den cas di pueblo, duna respet pa haya respet di comunidad. “Y mescos ora cu nos Prome Minister a bay asina leu di falta respet di Gobernador, cu ta otro ehemplo pa cual mi ta bisa cu mester di haci auto- reflexion un rato”, el a remarca.

Den e cuadro di PDR di semper busca solucion, nan a presenta un concepto nobo di reglamento di orden, aworaki cu nan a experiencia na Hulanda cu leynan di embergadura hopi grandi ta wordo trata den apenas dos ora y mey pa tres ora, sin discusionnan innecesariamente largo. E parlamentario a indica cu PDR lo sigui insisti pa cambia e reglamento di orden, y a reitera su peticion pa e partidonan concerni bin na reflexion y no laga e situacion aki sigui escala, pasobra nos pais tin problemanan y retonan inmensamente grandi, cu mester wordo enfrenta, y e ta boga pa un dialogo.

Parlamentario mr. Bikker ta pone su mes como ehemplo di lidera su fraccion sin mester di confrontacion di ningun tipo, pasobra no ta den su naturaleza, ademas “mi a studia ley no boxeo” el a expresa.

Contestando un pregunta di prensa, el a indica cu e mandatarionan tur mester duna ehemplo, pero si un ta pone baricada y ta falta respet di Gobernador, e no ta dunando e miho ehemplo, no obstante cu no por trek bek pasado, por wak si pa futuro y reflexiona, busca dialogo, y respeta otro su opinion y derecho di expresion manera ta sosode den nos pais democratico y ta stipula den nos Constitucion cu ta reconoce e Derechonan Humano.

- Advertisement -

DUNA COMENTARIO

Please enter your comment!
Please enter your name here