Home General Menos di 1 porciento di e casi 32.000 pacient cu yega Emergencia...

Menos di 1 porciento di e casi 32.000 pacient cu yega Emergencia ta di berdad casonan urgente

0
0
SHARE
- Advertisement -

Dr. Cilie, director medico Hospital

ORANJESTAD (AAN): Den un encuentro cu prensa, miembronan di e team di maneho di hospital a duna informacion riba e trabao cu dr. Horacio Oduber Hospitaal ta haci pa pueblo di Aruba y bishitantenan.

   Emergencia ta un di e seccionnan mas importante di cualkier hospital. Aki mayoria di pashent ta yega y ta worde atendi segun e sistema di triage, cu ta un sistema cu a worde inventa durante guera pa atende cu e cantidad grandi di heridonan. E casi 32 mil clientenan cu ta yega anualmente via di sala di emergencia ta worde categorisa via di e sistema di triage.

   E director medico di HOH dr. Ezzard Cilie a sigura cu tur pashent cu yega hospital na sala di emergencia ta worde atendi door di un persona den e prome 5 minuutnan. E persona aki, un enfermero specialisa, ta evalua con urgente cada caso ta y si e tin duda, e ta consulta cu un dokter.

   E sistema di triage ta consisti di 5 color. E pashent cu haya color cora no mag warda y te keda atendi mesora. Ta trata di casonan hopi severo manera trauma, of un persona cu ta na punto di perde su bida. Den e cifranan di duna, por constata cu na 2013, 2014 y 2015, di e cifra anual (31 pa 32 mil) un total di 118 pashent, 134 y 117 tabata respectivamente pashentnan cu a yega y tabatin mester di ayudo urgente.

   “Esaki no ta ni un porciento di e total di pashentnan cu ta worde atendi anualmente na seccion di emergencia.” E pashentnan cu haya color oranje, mayoria biaha ta worde tende den e prome 10 minuutnan cu nan yega hospital, mientras cu color geel ta worde atendi den mas o menos 60 minuut. Muchanan cu no mag warda mas di un ora tambe ta cay den e grupo geel.

Personanan di edad, cu di bayna por sinta, apesar cu nan ta cay den color berde of blauw, ta trata di yuda nan den un ora di tempo. Esnan cu ta cay den color berde of blauw ta warda mayoria biaha 4 ora.

   “Esaki ta worde uza mundialmente, segun e sistema di triage. Mericanonan ta custumbra cu e sistema y ta contento cu e servicio na Aruba. Pero mayoria di nos hendenan aki ta pensa cu su situacion ta urgente y no ta dispuesto pa ningun hende pasa su dilanti,” dr. Cilie a splica.

Den e cinco colornan cu ta worde presenta den e triage, esnan cu ta haya colornan blauw y berde, en realidad ta pashentnan cu no mester busca ayudo na seccion di emergencia. “Nan ta pashentnan cu en realidad no ta urgente y por bay nan dokter di cas. Na 2012 esaki tabata casi 19 mil pashent; na 2013 y 2014 e tabata 17 mil.  Tur esakinan ta pashentnan cu no ta “suppose” di yega cerca nos pero ta bini toch,” dr. Ezzard Cilie  a bisa prensa.

Y a agrega cu aunke no ta trata di casonan di emergencia, nan ta worde trata toch. Tambe a haci un comparacion di e cifranan di 2013 te cu 2015, riba cuanto di e 31 mil pashentnan tin keho riba e servicio.

Y mayoria di nan ta esnan cu ta cay den e categoria di esnan cu en realidad no mester a bay Emergencia pero asisti na un dokter di cas.

Director Medico di HOH a señala algun cifra di januari cu ta mustra cu di 28 mil pashent cu nan a ricibi, 520 a worde admiti na hospital.

- Advertisement -

DUNA COMENTARIO

Please enter your comment!
Please enter your name here