Home General Pueblo di San Nicolas a aprecia Townhall Meeting riba refineria

Pueblo di San Nicolas a aprecia Townhall Meeting riba refineria

2
0
SHARE
- Advertisement -

ORANJESTAD (AAN): E Townhall Meeting di diahuebs anochi na YMCA San Nicolas a demostra cu pueblo ta aprecia e tipo di encuentronan aki, unda cu e mandatarionan ta duna informacion na pueblo riba temanan di interes sea pa e bario of pais Aruba. Prome Minister Mike Eman, hunto cu Minister di Asuntonan Economico y Energia Mike de Meza y Minister di Labor Paul Croes a sinta na mesa, hunto cu e lider di e team negociador Richard Arends, dilanti un publico grandi y a duna informacion riba e contractnan cu a worde firma cu CITGO pa logra reapertura di e refineria.

   A worde splica na esnan presente cu e prome fase ta rehabilitacion di e refineria durante cual proceso sumanan cuantioso lo worde inverti pa pon’e den condicional optimal. Den e di dos fase ta cuminsa cu e produccion diario di crudo pisa di Venezuela.

   Francis Oduber, representante di Oduber Contractor cu tin mas di 60 aña trahando na San Nicolas, tabata sinta den prome fila pa scucha locual miembronan di Gabinete Mike Eman tin di bisa relaciona cu e contract nobo cu CITGO pa reapertura di e refineria.” Semper di mi bida mi a traha den e refineria como contratista,” el a splica.

    “E presentacionnan tabata hopi bon y pa San Nicolas esaki sigur ta algo grandi. E hecho aki mester worde celebra den forma grandi pa tur hende realisa kico e reapertura aki ta nifica pa pais Aruba.” Oduber a bisa cu e hecho cu e refineria ta bay den funcion back, despues di e proceso di rehabilitacion, ta algo grandi pa industria di refineria y pa entradanan di pais Aruba, e ta algo enorme. “E ta trece un aliento nobo pa Aruba.”

   Locual e ta considera como algo historico ta e hecho cu Aruba ta bira doño di e refineria. Esaki ta algo hopi grandi y ademas tin e terenonanan tambe cu Aruba lo haya back. Otro aspecto cu lo trece un cambio grandi ta cu e refineria lo no trece contaminacion, ya cu e emision lo baha asina hopi cu Aruba lo bay tin un refineria hopi mas limpi cu tabatin den pasado.

   Un di e ciudadanonan den e Townhall Meeting na YMCA San Nicolas tabata Gregory, kende ta biba na San Nicolas pero nunca a traha den e refineria. Esaki, el a bisa, tabata un anochi cu e mester a asisti pa scucha pa su mes kico a worde logra den e deal. “Duna informacion ta hopi bon, pasobra semper bo ta scucha cos di diferente hende y no ta tur hende tin e informacionnan corecto. Despues di awenochi, mayoria hende sa exactamente kico ta bay pasa awor na San Nicolas. Mi ta hopi contento cu esaki.”

   Tambe e ciudadano aki a haya e anochi uno facil y comprendibel pa e forma con Minister de Meza a trece e detayenan di e contractnan firma cu CITGO dilanti. El a uza un mapa pa mustra esnan presente cual area CITGO ta keda cune y cual ta bay back pa pais Aruba. Pero tambe kico Gobierno tin pensa di haci cu e terenonan aki. E noticia cu Gabinete Mike Eman y su team negociador a pusha pa e refineria aki ta mas berde posibel usando gas den nan operacion, ta algo cu e mes y ciudadanonan di San Nicolas ta aprecia hopi mes. “Awo nos no ta bay tin mas e problema di e huma cu ta sali for di e pipanan. E ta bon pa San Nicolas, pasobra e lo no trece molester mas pa e habitantenan ora cu biento cambia di direccion.

   “Mi ta contento con tur cos a bay manera tur hende tabata kier. Awor ban sigui.”

- Advertisement -

DUNA COMENTARIO

Please enter your comment!
Please enter your name here