Leanne Mous a gana e di dies seis Premio pa Tesina VanEps Kunneman VanDoorne.
El a ricibi e premio, consistiendo di un certificadoyi un check, for di man di abogadonan Carlos Winkel y Aubrich Bakhuis. Anualmente ta otorga e Premio pa Tesina pa e mihor tesina di graduacion di studiantenan na Facultad di Lei na University of Curaçao.
E aña aki e Facultad a scoge cinco candidato cu a bin na remarke pa e premio. A evalua tur tesina di e nominadonan cu un ocho of mas halto.
Den scogemento pa e tesina ganador, a paga tino riba diferente criterio, entre otro pregunta, originalidad, strudtura, relevancia social y balor agrega cientificamente.
E tesina ganador di Leanne Mous, cu e aña aki a gradua cum laude, ta bay tocante metodonan di deteccion no-ortodox manera detectornan di mentira, terapia di popchi of uzo di un suero di berdad. Mous a investiga e pregunta si por bari e metodonan aki completamente for di mesa of no.
Segun abogadonan Carlos Winkel y Aubrich Bakhuis, e ta un tesina cu un topiko hopi original, pero specialmente tambe cu un argumentacion hopi fuerte: “Leanne a sali pafo di e canalnan comun, door di haci uzo di hopi literatura stranhero di literatura pafo di su mes area di specialidad, manera sicologia. Door di esaki, su tesina tin hopi profundidad, loke ta haci’ e ganador mereci e aña aki.”
Como organisacion caminda conocimento ta para central, VanEps Kunneman VanDoorne ta duna hopi balor na bon enseñansa. Bon enseñansa ta crea chensnan pa futuro generacionnan den e comunidad caribense caminda e oficina mes tambe ta opera. E entrega anual di e premio pa tesina ta un iniciativa pa sostene esaki. Otro iniciativa tabata entre otro donacion di paketenan di buki na scolnan basico na Aruba, Bonaire, Corsou y St. Maarten na 2015.
