Home Politica AVP ta invita fraccion di MEP pa un “bustour”

AVP ta invita fraccion di MEP pa un “bustour”

0
0
SHARE
- Advertisement -

Pa mira unda biyones di florin a bay y lo no para na cas di ningun famia di lider di MEP

ORANJESTAD   (AAN) — Parlamentario Sr. Melvin Tromp a emiti un comunicado den cual e ta menciona cu ora  scucha miembronan di fraccion di MEP insinua cosnan cu ta for di sla, e ta bolbe confirma e hecho cu e mentalidad politico di e partido aki no a cambia bou di liderazgo di Evelyne Wever Croes.

Keto bay fraccion di MEP  ta mustra cu nan no a capta e mensahe cu pueblo di Aruba a manda pa e partido aki despues di ocho aña di mal gobernacion, esta di bira serio y cuminsa pensa riba pueblo di Aruba y no riba famia y amigonan manera a sosode ocho aña largo, segun Parlamentario Melvin Tromp.

“Bo ta core rond tur dia, no den un bario so, no den un caya so pero den tur bario rond di nos isla,  y por mira desaroyo y cambionan cu a bin ta tumando luga y cu lo sigui tuma luga den proximo añanan.

Gobierno di AVP ta sigui ehecuta su programa di gobernacion presenta na pueblo tanto na 2009 como na 2013 caminda a cambia rumbo di un pais malogra pa gobierno di MEP, neglisha por completo pa un gobierno geel cu pueblo a kere aden pero cu a laga pueblo y henter e pais na caya totalmente.

Tanto den e bario caminda e sede di MEP ta situa tin cambionan tumando luga, cambionan cu gobierno di MEP nunca a duna atencion y asina por sigui mustra riba tur otro bario di Aruba y pueblo por mira caminda e placa di pueblo ta bay, esta pa drecha y percura pa nos pueblo por biba den un pais desaroya caminda ta sigui eleva e nivel di bida di nos hendenan.

Kico nos a bin ta mira for di 2009 caba y despues cu Evelyne Wever Croes a bira lider di e partido, ta cu e unico vision nobo cu el a presenta pa futuro di e partido, ta di insisti cu pueblo cu tur cos ta malo, cu tur cos cu ser haci na bienestar di pueblo y di nos pais, ta malo y cu nada ta bon.

Evelyne y su partido a bay asina leu na insisti na Hulanda pa gobierno di Reino interveni aki na Aruba, pa trapa nos isla su autonomia ya cu  e lider di MEP a mira cu ta e unico forma pa evita cu pueblo lo mira y sinti e diferencia grandi cu a surgi despues cu a manda e Gobierno geel cas.

Casi ocho aña despues cu pueblo a core cu Gobierno di MEP malamente, ainda e partido y su lider nobo no por splica pueblo kico den ocho aña di gobernacion, nan a haci cu biyones di florin cu nan a ricibi na entrada extra.

No a drecha enseñansa, no a percura pa esunnan di menos entrada, a kita derecho di trahadonan publico, no a atende cu interes di pensionadonan,  a hinca e fondonan di pensioen den peliger serio y a hinca e pais den un situacion di crisis formal y pa completa obra, Gobierno di MEP a bisa Valero pa coi e refineria pone riba nan lomba y bay cune for di Aruba.

Awe lider di fraccion di MEP encabesa pa nan lider Evelyne kier  pa henter pueblo hunga wega di caco  scondi y keda sin mira kico Gobierno di AVP a haci pa e pais aki, cuanto cos a cambia, cuanto cos a drecha, miyones inverti den enseñansa, den reconstruccion di centro di ciudad cu gobierno di MEP a transforma den un centro pa adictonan abulante.

Si lider di MEP y su banda cu yama fraccion kier un ‘bustour’ pa mira tur loke a haci cu e placa cu nan ta papia di dje, cu sumo placer fraccion di  AVP lo percura pa un bus grandi busca nan na Parlamento of caminda nan ta traha, ya cu ta solamente ora di conferencia di prensa di e fraccion nan ta duna acto di presencia na Parlamento, pa asina nan por wordo splica tur loke a bin ta tumando luga den apenas shete aña di gobernacion di partido AVP.

Ainda tin cosnan grandi na caminda, cosnan positivo pa nos pueblo ya cu ta e plan di gobernacion di AVP lo sigui wordo ehecuta na bienestar y felicidad di nos pueblo,” Parlamentario Melvin Tromp ta mustra.

- Advertisement -

DUNA COMENTARIO

Please enter your comment!
Please enter your name here