Home Hudicial “Door cu mi no a haya cuminda na cas mi a bay...

“Door cu mi no a haya cuminda na cas mi a bay horta den supermercado”

0
0
SHARE
- Advertisement -

Dama sospechoso ta bisa Hues

ORANJESTAD    (AAN) – E dama M.M.(25) naci na Hulanda biba na Aruba y e homber A.F.(20), naci na Sint Maarten biba na Aruba a presenta dilanti Hues pa e caso penal cu Ministerio Publico a cuminsa contra nan. Tabata increibel pa scucha e dama bisa Hues cu pasobra e no a haya cuminda na cas el a bay haci asalto den supermercado y A.F. na dado momento a bay yud’e. Tur dos a wordo haya culpable y ambos a haya castigo combina.

ACUSACIONNAN

Fiscal a bisa Hues cu e acusacion contra M.M. y A.F. ta cu riba 13 April 2016, nan a haci un asalto riba un supermercado, caminda M.M. a usa un klop y A.F. un cuchiu grandi. Nan a bay for di e supermercado cu blekinan di tuna.

Ademas di esey, Fiscal ta acusa A.F. cu riba 16 Februari 2016, el a haci un asalto riba e mesun supermercado.

Tambe Fiscal ta acusa A.F. cu riba 13 April 2016, o sea dia cu e y M.M. a haci e asalto riba e supermercado, el a kibra glasnan di e supermercado y tambe glasnan di auto di e doño Chines.

Fiscal tambe a mustra cu dia 19 Maart 2016 A.F. a kibra glas di auto di Polis.

Fiscal tambe ta acusa A.F. cu riba 18 Januari 2016, el a horta tas for di un Ford Explorer.

ASALTO SUPERMERCADO

Hues a puntra M.M. pakico el a bay haci e asalto. M.M. a bisa Hues cu door cu e no a haya cuminda na cas, el a dicidi di bay horta for di supermercado. El a bisa cu A.F. no tabata sa di esaki. Ta ora cu esnan den supermercado a gar’e, el a cuminsa grita A.F. pa yuda. A.F. tabata warda pafor. A.F. a bira violento y a saca cuchiu mientras cu M.M. tabatin un klop cun’e.

Hues a bisa cu segun doño di e supermercado, ta M.M. a bira agresivo. Hues a puntra A.F. pakico e no a drenta e supermercado. Segun A.F. el a horta un biaha caba eynan. El a bisa cu door di hamber cu e no por a wanta y a bay cu M.M. horta.

Segun A.F., ora el a tende gritamento y cu e Chines a sera porta di supermercado, el a pensa cu nan tabata bati M.M. El a bisa Hues cu el a pidi e Chines pa laga M.M. bay pero e Chines no kier a haci esaki. A.F. a admiti cu e tabata cana cu un cuchiu grandi y cu e tabata haci esaki pa defende su mes contra otronan cu e tin problema cun’e. Segun A.F., ora el a mira e Chines cu un klop den man el a pensa cu lo maltrata M.M. y pesey a saca cuchiu riba dje.

El a admiti di a kibra glasnan di e supermercado. Tambe el a admiti di a horta for di un Ford Explorer.

KIBRA GLAS DI PATRUYA DI POLIS

Hues a puntra A.F. si el a kibra e glas di patruya di Polis. Segun A.F. ta Polis mes a busca cu e glas a kibra. Ora el a wordo deteni, Polis a core hopi duro y bruto y e tabata patras ta bolter y su pia a kibra glas di e patruya. Riba pregunta mr. Zara por compronde cu A.F. tabata geboei na su mannan.

EXIGENCIA DI FISCAL

Fiscal a bisa cu e ta haya legalmente proba e asalto arma. Na opinion di Fiscal, M.M. y A.F. a bay na e supermercado. M.M. tabatin un klop cun’e y A.F. un cuchiu grandi. M.M. a bisa cu e tabatin hamber y a bay horta. Ambos a bay e supermercado pa horta. M.M. a coy dos bleki tuna hinca den su carson. Na salida el a wordo para door di un dama Chines kende a bis’e pa saca e blekinan. E ora ey el a bira agresivo.

Fiscal a bisa  cu e ta haya proba cu riba 16 Februari 2016, A.F. a haci un asalto arma. Tin imagen di camera cu ta mustra esaki. Fiscal a mustra cu ta despues cu e A.F. a saca cuchiu pa e Chines, e Chines a bay paden y bin cu un pida tubo. Tambe Fiscal ta haya proba cu A.F. a destrui glasnan di auto di e Chines.

Fiscal a sigui bisa cu e ta haya proba cu A.F. a kibra glas di patruya. Na opinion di Fiscal, A.F. a declara na Polis cu el a skop 2 biaha riba glas pero no tabata su intension pa kibra e glas. Awor den Corte ta ripara cu A.F. ta declara otro cos.

Fiscal a mustra cu segun maneho di Ministerio Publico por exigi 32 luna di prison pero e ta tene cuenta cu e edad hoben di e sospechoso y cu e ta promer biaha cu e ta cay cera. Fiscal a exigi 18 luna di prison di cual 6 luna ta condicional cu un tempo di prueba di 2 aña. Fiscal a pone como condicional cu M.M. lo mester cay bou guia di Reclasering den e periodo di 2 aña aki.

Pa A.F., Fiscal a bisa cu segun e maneho di Ministerio Publico, mester a exigi 54 luna di prison pero aki tambe e ta tene cuenta cu circumstancianan y edad hoben.

Fiscal a exigi 30 luna di prison di cual 6 luna ta condicional cu un tempo di prueba di 2 aña. Aki tambe Fiscal a pone e condicion cu A.F. mester cay bao guia di Reclassering durante e period di prueba.

Fiscal tambe a exigi pa e klop y e cuchiu keda confisca.

SENTENCIA

Hues a pospone e caso un rato pa pensa y a dicta sentencia di biaha ora el a bolbe. Hues a bisa cu e ta haya legalmente proba cu M.M. a bay den e supermercado pa horta. Na opinion di Hues, ta ora cu M.M. a wordo gara e ora ey el a usa violencia. Hues a bisa cu e pregunta ta, si ta M.M. su so of hunto cu A.F. a haci e asalto. Hues ta haya cu M.M. tabata su so pasobra A.F. a keda pafor. El a condena M.M. na 18 luna di prison di cual 8 luna ta condicional cu un tempo di prueba di 2 aña.

Pa A.F., Hues ta haya legalmente proba cu el a menaza e Chinesnan den supermercado y no ta complice di e asalto. Tambe Hues ta haya cu A.F. a destrui e glasnan di e supermercado. Hues a sigui bisa cu e si ta haya proba cu promer A.F. a haci asalto na e supermercado. Tambe Hues ta haya A.F. culpable di a destrui glas di auto di Chines y tambe glas di patruya Polis.

Hues a condena A.F. na 24 luna di prison di cual 6 luna ta condicional, cu un tempo di prueba di 2 aña. Hues tambe a bisa cu e cuchiu y e klop ta keda confisca.

- Advertisement -

DUNA COMENTARIO

Please enter your comment!
Please enter your name here