Home Hudicial Homber a para riba cu e no a maltrata su baby di...

Homber a para riba cu e no a maltrata su baby di 7 siman

0
0
SHARE
- Advertisement -

caso a keda posponi pa mas investigacion

ORANJESTAD – Ayera mainta e sospechoso J.T. a presenta dilanti Hues pa duna cuenta pa e delito cu e ta wordo sospecha di dje cu ta presunto maltrato di su baby si 7 siman.

Na comienso Hues a bisa cu e caso ta pro forma o sea cu e tratamento lo no tuma lugar pasobra ainda e procesverbaal oficial no ta cla.

ACUSACION

Fiscal a bisa cu e acusacion contra J.T. ta cu entre 8 y 10 Maart 2016, el a maltrata su yiu homber baby di 7 siman. El a maltrata e criatura di tal manera cu e criatura a sufri fractura di ripchi, fractura di weso di pia y sla na cabez. Fiscal ta acusa subsidario cu J.R. a maltrata e baby cu consecuencia cu el a causa herida severo.

Fiscal a splica Hues cu ainda e procesverbaal no ta cla. Ainda e investigacion no ta cla. Mester scucha algun testigonan, falta raport di dokter y un relato di un experto di Hulanda. El a pidi pa pospone e caso pa October 2016.

ABOGADO TA PIDI PA LAGA SOSPECHOSO LIBER

Abogado mr. Zara a reclama cu ta tuma demasiado tempo pa investigacion. El a pidi pa suspende detencion di e sospechoso. Na opinion di mr. Zara, 10 Maart J.T. no tabata na cas ora e dama R. a lanta y constata cu su baby su pia tabata fractura. E ta haya cu tur esaki por verifica riba J.T. su cellular. El a remarca cu pakico e señora no a yama J.T. ora el a constata cu e criatura su pia ta kibra y a warda te anochi 7 ora J.T. a yega cas.

Na opinion di mr. Zara, no tin motibonan di peso. El a mustra cu e dama R. ta bisa cu ta J.T. a haci’e. E sospechoso ta bisa cu e no a haci’e. Segun e abogado, J.T. semper a percura pa su yiunan. No tabatin ningun motibo pa e trata e yiu aki diferente.

Mr. Zara a sigui bisa cu Fiscal por a pidi video di camera di supermercado unda J.T. tabata pa verifica cu e tabata eyna. Sinembargo door di tarda, no por haya e imagennan. Haya cu pa wanta e caso te October 2016, kiermen cu J.T. ta sera 6 luna en esepera di e caso. E abogado a bisa Hues cu e no ta kere cu si laga J.T. liber e lo no por stroba e investigacionnan andando.

E abogado a bisa Hues cu J.T. tin trabou y lo por bay traha atrobe den e construccion di hospital. E hecho cu no a kit’e ta pasobra e ta un professional den su trabou y nan mester di dje. Segun e abogado, J.T. lo cumpli cu tur condicionnan cu Hues stipula. El a pidi pa investiga cellular di J.T. y lo por determina cu e no tabata na cas. E ta haya cu si haya imagennan di supermercado Fontein lo por mira cu J.T. no tabata na cas ora e incidente a sosode. El a remarca tambe cu loke a pone riba facebook no ta cuadra cu loke e relato di dokter ta papia. Tambe ta wordo papia cu J.T. lo tin problema mental siendo cu no ta asina.

REACCION FISCAL

Fiscal a bisa cu awor no ta e cuestion si tin suficiente prueba of no. Ta ora di tratamento di e caso lo determina esey. El a mustra cu aki ta trata di un caso serio di maltrato di un baby di 7 siman, caminda e criatura a sufri diferente fractura. Dokter di mucha a constata maltrato di e criatura. Na opinion di Fiscal, e sospechoso ta purba saca su mes di e caso. Tin declaracion cu e ta hopi agresivo. Tin dos testigo cu ta papia diferente di loke abogado ta papia. Fiscal a sigui bisa Hues cu ainda tin un investigacion andando.

El a pidi pa rechaza peticion di abogado. Pa loke ta e peticion di investigacionnan cu abogado ta desea, Fiscal a splica cu e cellular di J.T. a wordo manda Curacao pa wordo investigacion. No por bisa nada di imagennan di supermercado. E ta kere cu lo a pidi esaki pero esakinan no ta disponibel mas. Tin un experto nombra cu lo bay evalua e estado mental di e sospechoso.

SOSPECHOSO TA PARA RIBA

J.T. a bisa Hues cu e mama R. ta culp’e pero e no tabata presenta. El a bisa cu merdia el a bay cu hende y no tabata na cas. El a bisa cu e no tin nada di sconde. El a bisa Recherche pa check video na supermercado pero no a haci nada. E ta stima su famia. Hues a bisa cu e ta bay evalua un rato y lo bolbe pa tuma un decision.

SOSPECHOSO A RABIA CU FISCAL

Por a nota cu J.T. a rabia y lanta para mira Fiscal. Abogado mr. Zara a bay papia cune pa trankilice. Miembronan di CEA tabata para cla.

DECISION DI HUES

Hues a bolbe y a bisa cu e ta rechaza e peticion di abogado. El a bisa cu tin motibo di peso. E peticion di abogado pa investigacion riba facebook, Hues no ta haya relevante y e otro investigacionnan lo wordo traha ariba. Hues a bisa cu e ta postpone e caso pa dia 30 September pa 10.30 di mainta.

- Advertisement -

DUNA COMENTARIO

Please enter your comment!
Please enter your name here