Home General Ta lamenta cu no a haya contractonan cu Citgo ‘ter inzage” den...

Ta lamenta cu no a haya contractonan cu Citgo ‘ter inzage” den reunion cu gobierno

0
0
SHARE
- Advertisement -

Dangui Oduber di fraccion di MEP:

Ta lamenta cu no a haya contractonan cu Citgo ‘ter inzage” den reunion cu gobiernoORANJESTAD (AAN) : Parlamentario di fraccion di MEP Dangui Oduber a participa den e reunion di Parlamento dialuna mainta ora cu Prome Minister Mike Eman y Minister di Asuntonan di Refineria Mike de Meza a suministra informacion na Parlamento riba e acuerdo logra cu CITGO y otro detayenan di e negociacion y loke ta bay pasa awor.

Tabata Parlamento cu a pidi pa Gobierno bini Parlamento y duna informacion. Oduber a expresa cu esaki ta algo cu nan a pidi, y tabata desea un reunion publico y a pidi adelanta pa mira e contractnan, ya cu esaki ta algo cu mester worde comparti. Sinembargo no a haya e contractonan ainda.

Loke a tuma luga den e reunion di Parlamento ta cu e Team Negociador a presenta loke nan a negocia y “contracto mes nos no a mira ainda.

Y esaki ta algo cu nos ta lamenta pasobra nan a bisa cu ora nan bini Parlamento, nan ta bini cu e contract “ter inzage” pa e miembronan di Parlamento lo por repasa esaki, pero e no a sosode.

E team negociador a duna un presentacion, mientras cu Prome Minister Eman y de Meza a duna hopi informacion. Pero toch “nos tin cu bisa tin algun punto cu nos ta keda critico riba dje. Nos tur na final di dia ta contento cu tin un reapertura. MEP tambe a para pa esaki, pero ta logico cu como fraccion y partido kier mira kico ta para den e acuerdo. Awe den linea grandi a haya kico ta e acuerdo cu a firma cu CITGO, pero den detayes nos no a bay, pasobra e contracto no ta disponibel ainda. Loke bo por conclui ta cu en realidad nos no a yega caminda nos kier yega ainda.”

El a sigui splica cu un di e exigencianan tabata cu e refineria mester por draai riba gas. Gobierno di Aruba a firma cu CITGO un MOU pa explora e posibilidadnan pa e por draai riba gas. Kiermen awor ta bay sondea e posibilidad pa e refineria draai riba gas. Ora cu esaki ta cla, lo firma un otro acuerdo pa e refineria draai riba gas.

Un otro punto cu MEP ta critico riba dje ta e mercado laboral. Den e presentacion a Sali na cla cu 20% di e empleadonan cu bin labora den CITGO, ta stranhero. Pesey nan kier puntra Gobierno con a yega na e porcentahe ey. Como pais, e hendenan cu ta biba aki ta e promenan yama pa labora den e refineria. E ta bisa cu den pasado ni Valero ni Costal no tabatin un reparticion di cuanto empleado mester ta di afo. Den e caso aki CITGO a pone e condicion aki cu ta 20%.

Otro punto cu ta cuestiona ta e hecho cu den e presentacion a bini dilanti ta cu Arubianonan ta bini na prome luga si nan cumpli cu e exigencianan. “Bo no sa ki exigencianan CITGO ta bini cune. Den esaki tambe por tin wega cu ta worde hunga, pero ta bisa despues cu mayoria di e Arubianonan cu a solicita no ta cumpli cu e exigencia, habriendo e posibilidad pa busca hendenan di afo. Esaki ta algo cu nos lo sigui haci pregunta riba dje y nos kier contesta riba nan.”

Otro asunto ta e acuerdo fiscal. E Parlamentario ta bisa cu e ta expresa esaki pasobra tur comerciante local ta paga 28 porciento na winstbelasting, mientras cu CITGO a yega na un palabracion cu nan ta paga 10% te cu ganashi di 100 miyon y riba esaki nan ta paga 6% cu MEP ta kere cu mester tin igualdad pa tur comerciante na Aruba cu ta e “backbone” di e economia di Aruba, cu nan a carga den tempo cu Valero a cera su portanan. Algo mester worde haci pa e situacion cu tin actualmente na Aruba.

Oduber ta bisa cu semper Parlamento, y nan como sirbido di Pueblo semper ta dispuesto pa bini reunion den periodo di reces, si esaki ta algo urgente. Si haci apelacion na MEP, nan ta dispuesto pa coopera y e Oduber ta kere cu e asunto di refineria ta algo cu tin urgencia pa worde trata.

- Advertisement -

DUNA COMENTARIO

Please enter your comment!
Please enter your name here