Home Hudicial Teenager di 16 aña a saca dama di 29 aña na estado...

Teenager di 16 aña a saca dama di 29 aña na estado y ta droga y horta

1
0
SHARE
- Advertisement -

Abogado ta señala situacion hopi tristo cu mester di atencion

corteORANJESTAD (AAN): E mucha di inicial J.D. di apenas 16 aña di edad, a presenta dilanti Hues pa duna cuenta pa dos caso di ladronicia den cas. El a bisa cu el a worde menaza pa dos homber pa drenta un di e casnan pero ni Fiscal ni Hues no a kere e storia aki. El a worde condena na castigo combina y bou guia di Reclasering.

    ACUSACIONNAN:

    E acusacionnan cu Fiscal a presenta contra J.D. ta cu riba 3 di Maart 2016, el a horta na un cas na Cas Ariba. Tambe e ta worde acusa cu riba 29 Januari 2016, el a horta na un cas na De Vuyst aparatonan electronico.

    LADRONICIA FOR DI CAS:

    Hues a puntra J.D. si e ta culpable. J.D. a bisa cu e no ta bisa nada pasobra e no a haci nada. Tata di e sospechoso tabata presente y representante di Reclasering.

Hues a mustra cu Polis a traha un procesverbaal. Investigacion haci pa miembronan di Recherche riba e caso di 3 di Maart 2016 ta mustra cu segun declaracion di J.D., el a worde menaza pa dos persona pa drenta den e cas y door di miedo el a haci’e. Segun J.D. su declaracion na Recherche, un di nan tabatin dread logs. Por a nota cu durante tratamento di e caso, J.D. tabata masha fresco cu Hues. Cada vez cu Hues puntra algo e ta contesta mas cortico. Hues a puntr’e cu despues cu el a horta e cosnan kico e dos personannan a haci. El a bisa cu e dos hombernan a core bay un direccion y el a core bay otro direccion. El a bisa cu e dos hombernan ta mas grandi cun’e y pesey el a haci loke nan a bis’e. Hues a bisa cu di con nan no a drenta via e bentana. El a bisa pasobra e ta mas chikito.

Hues a puntra si no ta straño cu nan ta bis’e pa drenta e cas. El a bisa cu si. El a bisa cu nan tabatin cuchiu cu nan y a mustr’e.

   Pa loke ta e caso di 29 Januari 2016, Hues a mustra cu segun e procesverbaal, J.D. a forza porta di cushina pa drenta y a horta un televisor. E señora doño a bay check na un lugar eybanda y a hay’e. El a bay notifica Recherche y investigacion a mustra cu ta e amiga di J.D., G., a bay bende e television y a haya 200 Florin pa esaki. A resulta cu J.D. a pase e television.

Nan a reparti e placa. Na cas di G. a haya un Apple iPad bao di matras. Segun G. e no tabata sa cu e iPad tabata bou su matras. El a mira J.D. cu e iPad pero no sa cu J.D. a lag’e na su cas. Ta asina cu J.D. a admiti di a horta e television y e iPad.

    RAPORT RECLASERING:

    For di e raport di Reclasering cu Hues a haya, e ta mustra cu Reclasering ta preocupa cu J.D. Ta asina cu J.D. ta bisa cu e no ta den gang pero e amiga ta bisa cu J.D. ta forma parti di e gang di Weg Kust Batterij. Segun e rapport di Reclasering, door di kiebro den famia, J.D. a bay riba mal caminda. E mama a bisa cu J.D. ta bira agresivo ora e hala su atencion riba uso di droga. E mama ta desespera riba e situacion di J.D. El a worde kita for di school door di problema di gang. E tabata hunga basketball hopi bon pero door di gang el a stop. E ta un adicto na marihuana. Reclasering ta teme cu e lo bolbe haci mesun cos. E ta cabez duro pero e tin un padastro cu ta hopi positivo pa J.D. E conseho di Reclasering ta pa J.D. ta bou di nan guia.

   Hues a scucha e representante di Reclasering, kende a mustra cu J.D. mester di diciplina y guia. Segun e representante di Reclasering, lamentablemente no tin un centro adecuado cu lo por haci esaki. E ta kere cu via OC lo por guia J.D.

Hues a papia cu e padastro y tambe cu J.D. E padastro ta haya e idea di Reclasering bon y J.D. tambe ta dispuesto pa bay.

   DEMANDA:

   Doño di e cas na Cas Ariba a demanda casi 4.000 Florin di daño di dos televisor, un mountain bike y algun holoshi. E dama di e cas na De Vuyst caminda a bay cu e televisor y iPad a demanda mas o menos 1.000 Florin.

    EXIGENCIA DI FISCAL:

   Fiscal a bisa cu tur cos a cuminsa cu ladronicia na e cas na Cas Ariba dia 3 Maart 2016. Autoridad a haya fingerprint na un bentana. J.D. a bisa cu riba orden di dos homber el a drenta e cas. El a duna descripcion masha poco di e dos hombernan cu a menace cu morto pa e horta. Fiscal a bisa Hues cu e no ta kere e declaracion aki. Fiscal a remarca cu J.D. no a bay Polis despues di e ladronicia. E no sa nan nomber. Fiscal ta haya legal proba cu J.D. a horta na e cas y tambe e otro ladronicia na De Vuyst.

   Fiscal a mustra cu ladronicia di cas ta un violacion grandi riba privacidad di hende. Hende mester sinti nan mes sigur den nan cas. Hendenan ta traha duro pa yega na nan cosnan. Na opinion di Fiscal, door cu J.D. ta menor di edad mester pidi Hues pa aplica ley hubenil. Normal pa ladronicia ta exigi 5 luna di prison. Den e caso aki, Fiscal ta tene cuenta cu ta promer biaha cu J.D. ta cay sera pa ladronicia y tambe ta tene cuenta cu e raport di Reclasering.

Fiscal a exigi 240 dia di prison di cual 100 dia ta condicioinal cu un tempo di prueba di 2 aña. Segun Fiscal, ya caba J.D. tin 124 dia sera. Fiscal a pone condicionnan special cu J.D. lo mester presenta na Reclasering y durante 2 aña e lo mester sigui tur indicacion di Reclasering. Fiscal a bisa tambe cu J.D. lo mester haci testnan periodicamente di droga y sigui guia na OC.

Pa loke ta e demanda di e dama di De Vuyst, el a pidi Hues pa rechaza esaki pasobra no a presenta ningun recibo. Pa loke ta e demanda di Cas Ariba, el a pidi pa reduci esaki na 2000 Florin pasobra e articulonan ta mas o menos 2 aña bieu.

    DEFENSA:

    Abogado mr. Zara a defende J.D. pa e caso Cas Ariba. Na opinion di e abogado, J.D. ta admiti e otro caso pero ta desmenti esaki. Esaki ta mustra cu si el a haci malo e ta admiti y pesey e no a admiti. E abogado a mustra cu Polis a mira dos homber ta cana bay cu articulonan cu ta mustra horta. Esaki ta mas o menos cuadra cu loke J.D. a declara esta cu el a worde menaza. Den e otro caso di ladronicia si a haya e cosnan horta pero den e caso aki no. Esaki ta crea cierto duda. No ta haya cu tin prueba legal y convicente cu J.D. a horta for di e cas. Pesey e abogado ta haya mester declara J.D. liber pa esaki.

   Abogado mr. Kock cu a defende J.D. pa e otro caso, a bisa Hues cu e ta haya cu e situacion di J.D. ta hopi tristo. El a mustra cu un mucha di 16 aña ta saca dama di 29 aña na estado. E ta bay hunto cu e dama aki na un lugar pa cambia e articulonan horta. E abogado a menciona con raport Reclasering ta describi e situacion serio di J.D. E abogado a bisa Hues cu lo ta bon pa J.D. sigui guia. E abogado ta referi na decision di Hues.

  SENTENCIA:

   Hues a sera tratamento di e caso y a dicta sentencia di biaha. Hues a bisa cu e ta haya legalmente proba tur dos ladronicia. El a bisa cu e no ta kere e storia di J.D. cu el a worde menaza door di dos homber.

   Hues a bisa cu e ta confirma e exigencia di Fiscal y ta condena J.D. na 240 dia di prison di cual 100 dia ta condicional cu un tempo di prueba di 2 aña y bou guia di Reclasering.

   Hues a bisa cu e ta spera cu esaki lo drecha J.D. su bida. Hues ta haya cu J.D. mester keda leu di gang y droga. Si no haci esaki e lo bay keda cay sera. Si e drecha su bida e lo por tin un bon futuro. Contrario na Fiscal, Hues si a confirma daño pa e dama di De Vuyst na 600 Florin mientras cu pa e doño di cas na Cas Ariba, el a aumenta esaki na 3000 Florin.

- Advertisement -

DUNA COMENTARIO

Please enter your comment!
Please enter your name here