Home Politica Analisis politico

Analisis politico

0
0
SHARE
- Advertisement -

Nivel

Poco tempo pasa ora cu Nel Oduber a dicidi di drenta den actividad pa yuda rescata MEP nos reaccion tabata hopi positivo pasobra nos a spera cu e lo usa su añanan di experiencia den politica pa eleva e nivel di maneho di e partido geel. No tabatin duda cu e guia cu Evelyn Wever Croes ta dunando MEP tabata mustra cu e degeneracion ta birando pio tur dia mas.

   Evelyn no por trece e cambio cu ta asina necesario pasobra e no ta realisa mes con malo su partido ta worde mira den nos pueblo. Te ainda e ta cana na man di su tata  Hendrik Croes cu tin e influencia sumamente negativo ariba dje. Esaki a pone cu Nel Oduber a dicidi di purba di yuda pa evita cu nan partido lo cay mas cu e a cay den eleccion di aña 2013.

   Nos a yama Nel bon bini back den politica pasobra nos a spera cu e si a mira cu e nivel maligno y mentiroso cu Evelyn  ta hiba su politica ta fatal pa partido y e speranza tabata cu hustamente Nel lo haci su best pa cambia e idioma di partido di mentiranan categorico.

   Lamentablemente Nel a keda solamente cu dos articulo di nivel cu lo mester a bira e ehempel di un politica cu Evelyn lo mester a tuma over. Ta dificil pa haya sa si ta Hendrik Croes a pone ordo pa Nel cambia su acercamento di un politica nobo. Nel a keda si pero su declaracionnan a bira atrobe e engañonan di semper di partido MEP. Den partido mes tabatin basta dirigente cu e spera cu di berdad Nel a usa su experiencia di añanan pa mehora e posicion di MEP den opinion di nos pueblo.

   E por a haci esaki facilmente door di bin cu algun idea y plannan nobo pa duna e partido e imagen di un partido cu internamente a cuminsa reordena nan pensamentonan pa futuro di nos pais. Nel mester tin e respet ainda den nan organizacion  cu e por bin cu un enfoke nobo. E impresion a lanta ora Nel a regresa den top di partido cu e lo bin cu  un vision renoba cu lo stimula e hobennan cu kier mira un MEP cu ta haya un chispa positivo pa cambia rumbo di partido. Esaki no a cristalisa.

   Rapidamente Nel a bay back na e politica bieu di lansa un cantidad di mentira baho y a laga e idea di bin cu algo cu lo contribui na progreso  di e partido un banda. E pregunta den partido MEP mes a bira atrobe kico mester haci pasobra e libertinahe di ultimo añanan no ta bay yuda partido na nada. Hopi den MEP ta sinti cu mester bin un cambio grandi di direccion di partido pa recupera prome cu  proximo eleccion.

   Nan tambe ta consciente cu no por warda mucho mas y nan tabata pensa cu e influencia cu Nel por a bin cune tabata algo hopi necesario pero nan a mira cu lamentablemente e impulso nobo di Nel no a bin y nan ta ariba e caminda denigrante atrobe. Mas y mas esnan cu tin bista ariba e rumbo robes di partido ta cuminsa realisa cu tanten cu ta Hendrik Croes ta esun cu berdaderamente tin e timon di partido den su man nada ta bay cambia. Si tin hobennan mes cu lo por tin mas influencia den partido nan no ta haya oportunidad pa pone  nan talentonan disponibel na partido. Pa Aruba esaki ta keda un problema pasobra den un democracia sano mester tin un partido den oposicion cu ta haci e trabao di oposicion manera mester ta. Den MEP ta parce esaki ta hopi leu di worde realisa ainda.

- Advertisement -

DUNA COMENTARIO

Please enter your comment!
Please enter your name here