Home Hudicial Colaborador di Marechaussee envolvi den traficacion di cocaine for di St. Maarten...

Colaborador di Marechaussee envolvi den traficacion di cocaine for di St. Maarten pa Schiphol

6
0
SHARE
- Advertisement -

ORANJESTAD (AAN): Ta increibel con persona cu ta worde confia pa yuda den control contra traficacion di droga na Schiphol, ta abusa di e confianza aki y ta yuda narcotraficantenan drenta cu droga na Schiphol. Un colaborador di Marechaussee Real tabata bay busca e droga for di e mulanan den baño y tabata sali cu esakinan.

Informacion cu DIARIO ta dispone di dje ta mustra cu e colaborador aki (25) a apela su sentencia den Corte den Promer Instancia cu tabata 6 aña di prison. Den Corte Superior na Hulanda, Abogado General a pidi pa subi e castigo na 7 aña di prison.

    TRAFICACION DI COCAINA:

    E caso a bin na claridad ora cu na Maart 2015 a descubri e droga riba un di e personanan cu tabata transporta e droga (mula) durante control. E persona aki a dicidi di coopera cu e investigacion y a basha abou riba tur hende. Door di su cooperacion, dos otro sospechoso a worde deteni entre otro e colaborador di Marechaussee. For di e investigacion a bin saca afor cu na Februari caba un mula a hiba droga for di Sint Maarten pa Hulanda.

   FORMA DI OPERA:

   Investigacion a mustra cu e colaborador di Marechaussee tabata esun cu mester a busca e droga for di e mulanan. Esaki tabata sosode specificamente den e baño di personanan cu no por cana. E colaborador tabata bati tres biaha na e porta di e baño y esaki tabata e señal pa esnan cu a yega cu e droga for di Sint Maarten cu mester entrega e droga.

E otro persona (54) envolvi den e traficacion tabata percura pa e mulanan. E tabata paga nan pasashi pa bay Sint Maarten, tabata percura cu e personanan ta haya cellular y tabata percura cu nan tabata worde transporta pa y for di aeropuerto.

E personanan tabata keda den un hotel specifico na Sint Maarten y na e aeropuerto di Sint Maarten, un colaborador di aeropuerto tabata duna nan e droga cu nan mester a hiba Hulanda.

Unavez cu nan yega Schiphol, nan tabata worde instrui pa bay den e baño di hendenan cu no por cana y eynan e colaborador di Marechaussee tabata busca e droga.

Ta ser papia cu en total esta Februari y Maart 2015, nan a importa mas o menos 11 kilo di cocaine.

    CASTIGO:

    Ta asina cu Corte den Promer Instancia a haya e colaborador di Marechaussee y e otro persona (54) culpable y a condena nan na 6 aña di prison. Por a compronde cu e dos acusadornan y Ministerio Publico a apela e sentencia caminda Abogado General a exigi 7 aña pa e colaborador di Marechaussee y 8 aña di prison pa e otro persona cu tabata encarga cu e personanan cu ta transporta e droga.

- Advertisement -

DUNA COMENTARIO

Please enter your comment!
Please enter your name here