Desiree Croes: Si no bin cu un miho amienda, esun di mi lo keda riba mesa

Publication: Wednesday, 31 August 2016. Categoria: Politica

AMIENDA DesireeORANJESTAD(AAN): Firmante di e amienda presenta na Parlamento relaciona cu adaptacion di nos Codigo Civil pa atende cu asunto di union civil, esta mr. Desiree de Sousa-Croes a reacciona mesora riba preguntanan riba red social di con e mes no tabata presente den sala di Parlamento pa defende su amienda.

Manera ta conoci, henter fraccion di AVP, incluso Ministernan Dowers y Croes a opta pa no presenta mas den sala, pa no duna quorum y pa no contesta preguntanan.

Sinembargo, Parlamentario de Sousa a afirma cu e tabata na Parlamento, pero ora el a compronde cu su mesun fraccion lo no atende e reunion tampoco e dos Ministernan invita pa contesta preguntanan, el a dicidi e ora ey cu e tampoco lo drenta sala pa exigi pa continuacion di e reunion.

Di otro banda, e Parlamentario ta haya cu e hecho cu ta pidi tempo pa drecha e amienda of pa inclui derechonan di ciudadanonan LGBT ta un desaroyo positivo, pa cual ta bal e pena di warda un poco mas.

E lo a prefera pa a suspende e reunion pa 2 of 3 dia, pero Presidente di Parlamento, drs. Marisol Lopez a opta pa pospone te dia 8 di september.

Na final di su comentario, miembro di Parlamento, mr. Desiree de Sousa-Croes a vocifera cu si no bin cu un miho amienda of duna tur derecho, e ora su amienda lo keda riba mesa.

A nota si cu e fraccion di MEP a enfatisa cu ta Andin Bikker di PDR a pidi pa pospone e reunion locual no necesariamente ta cuadra cu berdad. E fraccion color cora a pidi pa pospone e reunion den nomber di (y cu aprobacion di) tur tres fraccion den Parlamento, pues incluyendo MEP y AVP. Ningun di e fraccionnan ta cla pa trata e amienda aki, pues no mester purba aparenta diferente.

Tur tres fraccion tin masha problema interno pa sostene e amienda riba mesa awor, pero ainda ningun di tres a presenta un alternativa tampoco. Parce cu e abogado independiente cu mester a cuminsa prepara un amienda alternativa tambe ta confrontando diferencianan di opinion entre e diferente organisacionnan/gruponan na fabor di e amienda. Esaki ta haci henter e situacion un poco mas complica ainda.

Leave a Reply