Diaranson ta firma cu gobierno y caminda ta hancho habri pa reapertura di Citgo

Publication: Wednesday, 31 August 2016. Categoria: General

Ehecutivonan di Valero a yega Aruba

  ORANJESTAD (AAN): Den un private jet, ehecutivonan di Valero Oil Company di Houston, a yega Aruba den oranan di diamars merdia pa firma e ultimo documentonan pa traspaso di e tereno y propiedad pa Aruba.

   Despues e documentonan ta bay Parlamento pa worde discuti y trata. E fecha di apertura di CITGO pa motibo di contratiempo a dura mas cu loke a pensa, pero awor caminda ta hancho habri pa asina dia 1 di october e trabaonan por cuminsa.

Na General Aviation Airport di Aruba, Ministernan Eman y De Meza tabata spera e grupo di ehecutivo di Valero cu te siman pasa ainda tabata den combersacion cu e team di Aruba pa por a yega na e miho deal posibel pa e isla y su hendenan.

   Un di e logronan sigur ta e hecho cu Aruba ta bira doño di e refineria. Eman tabata satisfecho y a expresa esaki tambe. Bayendo back den historia Eman a recorda con ora su gobierno a tuma rienda di pais Aruba na fin di 2009, a bin haya e refineria cera.

   “E tempo ey nos a hiba deliberacionnan cu Valero pa por a logra un reapertura na 2011 cu a dura te 2012”.  Apesar di a traha duro y incansabel, gobierno a traha todo por todo y a bay hopi parti di mundo pa trata na haya un partner pa Valero, no a logra den esaki. Minister de Meza nunca a perde speranza y a sigui busca y a haya un avenida cu CITGO Petroleum Corporation.

   “Por bisa cu awe cu yegada di ehecutivonan di Valero na Aruba nos ta yegando e punto culminante di e esfuerso grandi cu gobierno, y principalmente colega de Meza, a bin ta haciendo.” Eman a gradici e team negociado cu a traha pa periodonan largo deliberando den forma intensivo pa por a yega na unda Aruba kier a yega cu e refineria. E acuerdo cu CITGO mes a keda firma algun tempo pasa caba, pero tabata e acuerdo cu Valero cu mester a keda cla y cu a dura un poco. Pero awor esey tambe ta bay tuma lugar.

   “Mañan nos ta firma e acuerdo cu Valero ta bay traspasa su propiedad pa pais Aruba y asina e acuerdo cu CITGO por bay Parlamento. Nos ta spera cu den luna di september nos ta keda cla, pa na luna di oktober CITGO por cuminsa traha riba e refineria. Inversionnan grandi ta bay worde haci y ta bay bin mas di 2 mil cupo di trabao.” Eman a splica cu tabatin algun asunto di impuesto cu mester a keda regla cu Valero y cu nan a keda cla cu nan. E tabatin hopi palabra di aprecio pa e ehecutivonan di Valero cu semper a coopera cu Aruba ora tabatin mester.

Leave a Reply