Home Politica E debe nacional di nos pais a sobrepasa 4 biyon florin

E debe nacional di nos pais a sobrepasa 4 biyon florin

1
0
SHARE
- Advertisement -

Lider di PDR mr. Andin Bikker:

ORANJESTAD (AAN) – Fraccion di Partido Democracia Real a tene su conferencia semanal di prensa, Diamars, en su sede na Boegoeroei manera custumber.  Lider di PDR mr. Andin Bikker a trata varios punto di agenda, di cual e prome ta e aumento di nos debe nacional crea pa Gobierno.

Parlamentario mr. Andin Bikker a declara cu enfasis, cu gobierno di Aruba ketobay ta keda aumenta nos debe nacional.

PDR a tuma nota for di rapport di Banco Central y tambe den medionan di prensa, cu desde 2014 pa December 2015, e debe nacional a subi cu como 500 miyon florin.

Calculando cuanto e debe a subi, porcentualmente, pa luna el a sobrepasa 4 biyon. Segun e parlamentario si tuma 500 miyon den un aña bayendo pa dos, ta masha hopi mes e gobierno aki a aumenta e debe nacional sin tene cuenta mes cu den un temporada di gobernacion a redobla e debe y e ta sigui aumenta.

E parlamentario a subraya cu si nos tuma nota di e advise di CFT cu a sali recientemente, por mira cu e servicio di debe, kiermen e pago di interes, ta keda na un nivel alarmante di 215 miyon florin pa aña. Esey ta nifica cu nos pais ta pagando e suma aki anualmente solamente na servicio di debe, cu ta placa cu nos no ta haya pa inverti den nos economia.

Parlamentario mr. Bikker a subraya cu si e gobierno di AVP lo a hiba un bon maneho financiero y a atene su mes na e acuerdo cu a wordo firma na 2013, riba un Diahuebs Santo, cu Gobierno di Hulanda, aworaki lo por a refinancia e debe aki, y lo por tabata pagando na luga di un average di 5.5 pa 6.0 porciento, un 2.0 porciento na interes.

E parlamentario a bolbe menciona cu na un pais manera Alemania e interes ta nulo, casi nan ta paga pa bo fia placa. Pero na Aruba mientras cu interes ta bahando mundialmente, nos pais ta keda pagando un interes di 215 miyon pa aña na interes di 5.5 pa 6.0 porciento.

E mesun rapport di CFT ta bisa cu pa 2017 tin e oportunidad pa refinancia, pero esun di mas grandi den hopi aña. Aworaki, a yega e momento di para keto un rato y wak con por yega na un interes mas abao.

Parlamentario Bikker a subraya cu e ta compronde pakico no tin otro caminda; esaki ta door cu e gobierno aki a hiba un maneho desastroso y Hulanda ta unico cu ta dispuesto na financia na un interesa abao, pasobra door di nos gobierno su “ “credit rating” nos no ta haya riba mercado internacional un interes na 2.0 porciento, aparentemente.

Segun CFT tambe, mester bin claridad riba reapertura di e refineria mas pronto posible, esta si, of no. E parlamentario y lider di PDR a subraya cu, aparentemente (aunque ainda no a wak e presupuesto 2017), esaki ta basa grandemente riba e reapertura di e refineria.

Pues, mester bin claridad riba esaki pasobra si no lo tin un presupuesto irealistico atrobe. Aunque PDR tin entendi cu tur cos ta bayendo riba bon caminda, si tin un aspecto alarmante, y esaki ta cu Valero ta exigi pa e wordo paga 11 miyon dollar!

Tambe mr. Bikker a reacciona riba loke el a lesa den un medio di comunicacion, cu partido di oposicion lo sostene Valero. Esey no ta PDR, pasobra nan no tin contacto cu e compania. Ultimo carta cu nan a manda pa e compania aki tabata aña pasa, pidi nan para e desmantelacion.

E carta aki a logra su meta, segun reaccionnan cu a wordo duna, mr. Bikker a señala. PDR a compronde cu tin discusion tocante belasting y e fraccion tin un punto di bista masha cla riba esaki.

“Si e homber y e muher chikito akinan na Aruba, cada bez cu e debe cien florin 40 florin ta di belasting, y si no paga esaki na tempo su cas ta bay den vindishi, e no por compronde pakico Valero ta tuma un posicion asina, pasobra tur hende mester paga belasting. Si e tin diferencia di opinion tocante belasting e tin tres instancia cu por acudi na dje, pa purba bay busca su derecho”, mr. Bikker a expresa.

El a conclui bisando cu esaki no kiermen cu e compania ta bay haci mal uso di e posicion cu e tin pa haya un trato preferencial. “En todo caso, laga nos aclarea cu nos partido no ta para den ningun discusion na banda di ningun instancia cu ta opera e refineria cu ta pidi acuerdonan fiscal cu ta favorece nan riba algo cu no tin derecho riba dje!”

- Advertisement -

DUNA COMENTARIO

Please enter your comment!
Please enter your name here