jetBlue ta un socio sumamente importante pa Aruba

Publication: Wednesday, 31 August 2016. Categoria: General

Director di ATA sra. Ronella Tjin Asjoe-Croes:

ORANJESTAD (AAN)—Sra. Ronella Tjin Asjoe- Croes, director di Oficina di Turismo (ATA), a expresa den conferencia di prensa, relaciona cu e vuelo nobo di jetBlue pa Aruba, for di Fort Lauderdale, cu e ta un grato placer y satisfaccion hopi mas grandi, pasobra e logro aki a tuma hopi mas tempo.

Esaki ta cuadra perfectamente cu e strategia di Aruba, y no ta por nada nan a hinca e tempo y esfuerzo tambe y a fix di facto e ruta aki cerca Jet Blue tambe.

E director di ATA a reitera cu e satisfaccion ta hopi grandi y a menciona cu Merca a crece aña pasa cu 8 porciento y e aña aki te cu Juli a mira un crecemento di 2.7 porciento, y como meta pa e otro aña di cual jetBlue ta parti integral.

E meta ta crece e mercado di Merca cu 5 porciento. E esfuerzonan cu ta wordo desplega mester conduci na un crecemento continuo, fuera di locual a mira e ultimo añanan. Mester remarca cu e strategia di diversificacion ta keda esencial. Di parti di Merca a representa aña pasa 50 porciento di e bishitantenan cu Aruba a ricibi den un aña. Un par di aña prome por papia di 60 porciento, pero no mester lubida cu e tempo ey Merca tabata representa di 70 pa 75 porciento di e total di bishitantenan pa Aruba. Pues tin espacio pa crece y ora tin retonan nos dilanti, mester pone mas esfuerzo ainda den Merca pa resto di e aña aki y sigur pa otro aña tambe, pa contraresta retonan cu ta presenta, por ehemplo for di e mercado di Venezuela y pa sigura cu turismo di Aruba ta keda stabil y creciente cu e porcentahe di bishitantenan cu nos tur ta desea.

Esaki ta algo cu mester gradici e team di ATA tambe pasobra nan ta pone hopi empeño, nan a mira e exito, y nan haci tur esfuerzo pa logra e vuelonan aki tambe.

JetBlue ta un socio hopi importante, sra. Tjin Asjoe- Croes a remarca. E compania aki a crece entre 20 pa 25 porciento di nos bishitantenan durante e ultimo cinco añanan. Aña pasa Aruba a ricibi un average di 31 mil bishitante cu jetBlue, y no mester lubida cu dia a ricibi e di un miyon bishitante, na 2014, esaki tabata riba un vuelo di jetBlue tambe.

Leave a Reply