Logro aki ta bay ta un boost grandi pa San Nicolas

Publication: Wednesday, 31 August 2016. Categoria: General

Minister De Meza:

Logro aki ta bay ta un boost grandi pa San NicolasORANJESTAD (AAN): Minister ing. Mike de Meza tabata Diamars hunto cu Prome Minister mr. Mike Eman na aeropuerto pa yama bon bini na e grupo di ehecutivo halto di Valero cu a yega Diamars den oranan di merdia pa firma e ultimo documentonan pa asina e refineria bira propiedad di Aruba y su ciudadanonan.

   De Meza a splica cu mañan henter Ministerraad ta bay ta presente durante e ceremonia di firmamento di e documentonan pa despues nan por bay Parlamento. “Cu esaki nos ta completa e negociacionnan cu Valero y sigui pa e siguiente nivel.”

   De Meza: “Nos ta masha contento pasobra awor ta yega un final na e epoca ey. Una bes Parlamento pasa e conceptonan di ley ta keda formalisa cu refineria di Aruba tin un doño nobo. E doño ey ta gobierno di Aruba a traves di e compania estatal nobo cu ta bay worde institui cu ta yama Refineria di Aruba (RdA).

   Tambe nos ta bay haya un operador nobo cu ta conoci den e mundo di petroleo, esta Citgo USA.”  De Meza su alegria tabata notabel riba su cara, pasobra e miho cu ningun otro sa con pisa e lucha tabata. E refineria a stop su operacion pa 4 aña y mey y awor ta habri back. Mescos cu Eman, de Meza a enfatisa cu centenares di miyones di Dollar ta bay worde inverti den proyectonan cu na ta beneficio di Aruba y su hendenan.

   “Aruba ta bay traha cu un modelo completamente nobo cu ta bay nifica un ‘boost’ grandi pa San Nicolas y economia di Aruba. Tambe e refineria aki ta bay contribui grandemente na finanzas di pais Aruba. Ta algo hopi grandi ta sosodiendo aki.”

    Na final Minister de Meza a bisa di ta masha orguyoso di por a yega na e punto aki despues di hopi trabao durante e ultimo añanan. “Cu CITGO mes nos ta casi dos aña bezig, desde e ultimo kwartaal di 2014. Awor nos ta yegando e final.” Pa september tur cos mester ta cla pa asina start na inicio di luna di october.

Leave a Reply