Booshi Wever di UPP:
ORANJESTAD (AAN): Segun Booshi Wever di Partido UPP, un di e puntonan mas cardinal pa su partido for di tempo cu el a worde funda ta, banda di Enseñanza y Arubianismo, e aspecto di “Good Governance” of Bon Gobernacion.
UPP a dedica extra atencion den su programa di partido na e topico aki, y a amplia y desaroya un cantidad di puntonan pa asina mira con por rescata Aruba y e pueblo for di e abismo cu e sistema di patronahe y clientelismo politico a hinca nos aden.
UPP ta wak “Good Governance” como un instrumento hopi importante pa mara man di e politiconan cu ta uza gobernacion pa enrikese nan mes y nan compinchinan mas y mas y ta keda hinca pueblo cu proyectonan dudoso y cu ta hole na corupcion.
Den un comunicado anterior caba UPP, tratando e ley pa hotelnan, a denuncia e posicion intransigente cu Ministro cu ta haci cu e kier sin ningun clase di discusion habri, pa pasa e ley aki den strot di Parlamento y di e pueblo. Pushando esaki, na vispera di aña di eleccion, nos ta mira esaki como un instrumento pa duna e minister mas poder ainda pa e haci y deshaci riba tereno di All-Inclusive, ya cu ta e ta esun cu lo por duna excepcionnan riba e ley aki.
Esaki ta habri caminda tambe pa corupcion unda cu lo por tin pagonan pa fabornan haci. UPP a adverti pa e hecho cu pasamento di ley aki ta habri posibilidad pa “wheel and deal” na su antoho.
Tambe nan por a tuma nota, con e minister aki, por ehempel riba tereno di scheepvaart, awor ta papiando di bay privatisa Directie Scheepvaart, cu ta treciendo placa aden pa e caha di gobierno. Mientras cu ta papia bunita, e “bottom line” di esaki ta, cu atrobe placa cu mester bin den caha di gobierno, ta bay worde staciona na un NV, a la ANSA NV, pa asina por tin “agare” riba e fondonan aki.
UPP ta adverti, pa no keda strañá ora bo wak cu e NV-nan aki tambe ta bay financia p.e. conciertonan cu ta bin Aruba, pa yuda e promotornan amigo di e forma aki. Esakinan hustamente ta loke cu UPP kier evita, pa medio di e concepto di reglanan di “Good Governance”.
Cu introduccion di un NV asina pa scheepvaart, Ministro a bolbe haya oportunidad di yuda su compinchinan cu salarionan barbaro, mescos cu a sosode na ANSA NV, Aruparking, Arubus, ATA, etc.
Na mesun momento creaccion di un NV asina ta duna oportunidad pa emplea campañadornan, mescos cu el a haci cu Aruparking.
Pues ta pinta un situacion bunita, pero e intencion ta pa e tin mas cos di bisa riba e placa, cu segun nan mes ta bisa cu ta 25 miyon Florin pa aña.
Esta, nan por haci y deshaci cu esaki na nan antoho. Y e caha di placa di pueblo lo no haya e placa aki pa paga of cubri cosnan esencial den nos comunidad, manera p.e. un Educacion liber. Na momento cu gobierno no por subsidia enseñanza, ta cerca e pueblo ta bin back, ta cerca e mayornan ta bin back cu aumento p.e. di schoolgeld.
Pues UPP ta fuerte den su ponencia pa mara man di e politiconan.
