Home Politica Rene Herde mustrando kico ta Politica Populista vs. Politica Responsable

Rene Herde mustrando kico ta Politica Populista vs. Politica Responsable

0
0
SHARE
- Advertisement -

Rene Herde mustrando kico ta Politica Populista vs. Politica ResponsableORANJESTAD (AAN): Segun Rene Herde di AVP, rond di mundo tin e discucion riba e tipo di politica di partidonan politico. Den practicamente tur pais tin partido y politiconan cu ta practica politica “populista”.

   Tin diferente forma pa describi e tipo di politica y politiconan “populista” aki. Den combersacion cu lider di fraccion di AVP cu ta preparando cu e fraccion pa e aña parlamentario nobo, el a duna un splicacion di e “politica populista” y su peligernan.

Aki Rene Herde a bisa:  “Partido y politiconan populista ta dispuesto pa bisa bo loke Bo kier tende. No ta importa si e ta realistico of berdad. Nan meta ta pa Bo kere cu nan ta compronde bo, cu nan ta di acuerdo cu Bo, cu nan si ta sinti loke abo ta sinti y mas ainda cu nan tin un solucion pa logra exactamente loke Bo kier.

Nan ta capaz di contradeci nan mes ki ora cu ta y nan ta capaz di cambia nan posicion riba un tema ki ora cu ta cumbini nan, djis pa pone Bo kere cu nan ta di acuerdo cu Bo y pone Bo sinti cu nan ta compronde bo. E problema ta cu hopi biaha nan no ta conta henter e storia.

Nan no ta splica nan “solucion” esta si nan tin uno. Pero mas cu tur, nan ta bisa Bo loke Abo kier tende. No loke ta berdad of responsabel”. E splicacion di “politica populista” aki ta uno cu Bo ta tende mas biaha, rond di mundo. Tambe na Aruba.

   Na Aruba tambe tin partido y politiconan cu ta cuadra cu e descripcion di politiconan “populista”. Den combersacion cu Rene Herde’, el a duna algun ehempel di politica “populista” aki na Aruba mes. Rene Herde’: “Tin hopi ehempel, pero ata djis algun cu ta bini na mente: MEP ta scohe pa conecta Aruba via un cabel masha caro mes na planta di coriente genera pa forsa di awa na Colombia. En berdad e ta mas barata a corto plazo, pero e desbentahanan ta asina mas grandi.

   Pero MEP no ta menciona esakinan. Nan ta prefera pa crea e impresion cu prijs di coriente lo baha, sin bisa pueblo cu nos lo depende completamente di coriente di otro pais y di keda sin coriente manera ta e caso mucho hopi na Colombia. Un otro ehempel pa e asunto di pensioen di behez. MEP ta crea e impresion di por baha edad di pensioen. Cu esey nan kier gana simpatia di pensionado y trahadornan. Pero nan no ta bisa con lo haci’e. Si e tabata asina facil Tur rond di mundo nan a haci’e caba.

   Si e tabata sin riesgo of consecuencia, MEP a present’e caba. Berdad ta cu e lider di MEP mes a conseha su gobierno pa hisa e edad di pensioen mas lihe y den menos tempo. Awe e ta bisa net lo contrario pa purba gana simpatia di pueblo. Nan ta prefera pa gaña pueblo cu algo bunita, sin bisa con lo haci’e, kico ta e prijs y e consecuencianan. Un ehempel mas ta e forma cu partidonan MEP y PDR a anda cu e reapertura di e refineria. For di dia cu e refineria a sera nan a bisa cu nan tin companianan cu kier habri e refineria mes ora. Pero nunca nan a presenta niun compania.

   Cada biaha cu Parlamento a invita e companianan, nan a cancela y bisa cu nan tin freakout. Esey ta otro ehempel di crea un impresion pa yena wowo di pueblo, pero sin un plan serio. Tur cos djis pa gana simpatia. No pa yuda pais y pueblo. Nunca!”. Enbez di crea impresionnan falso asina, AVP ta rechasa e populismo ey y presenta na pueblo plannan y proyectonan cu ta sigura un miho bida pa tur hende, manera a haci e ultimo 7 aña. Rene Herde’: “Y ta asina, cu seriedad y sinceridad, nos lo sigui traha pa progreso di tur hende na Aruba den e añanan cu ta bin”.

- Advertisement -

DUNA COMENTARIO

Please enter your comment!
Please enter your name here