Home Hudicial Caso grandi di 8 extranhero envolvi den traficacion di 365 kilo di...

Caso grandi di 8 extranhero envolvi den traficacion di 365 kilo di cocaine mayan den Corte

0
0
SHARE
- Advertisement -

Si abogadonan ta den accion e caso lo bay door?

ORANJESTAD  (AAN) – Un grupo di 8 extranhero parti den Venezolano, Colombiano y Dominicano, lo mester presenta dilanti Hues mayan mainta pa tratamento di e caso penal cu Ministerio Publico a cuminsa contra nan.

Na Juni 2016 e sospechosonan a presenta dilanti Hues caminda Fiscal a bisa cu door cu abogado mr. Illes kier scucha testigonan, e caso ta pro forma.

IMPORTA 365 KILO DI COCAINA

E acusacion cu Fiscal a presenta contra e grupo ta cu riba 16 Februari 2016, nan tabata den posecion y importacion di 365 kilo di cocaina.

E grupo ta consisti di e Venezolanonan: T.L.Y., F.B.P., L.G. y A.P.V. Tambe tin e Colombianonan: Y.C.V. y R.R.C. Acerca tin e dos Dominicanonan: E.D.A. y N.T.

Ta asina cu na Juni 2016, abogado mr. Illes a pidi pa pospone e caso contra su clientenan. Na opinion di e abogado, ta importante pa pospone e caso pasobra el a pidi pa interoga tur e otro sospechosonan. El a bisa cu el a informa Hues Comisario cu a laga sa cu lo no ta posibel pa keda cla cu e interogacion promer cu e caso. El a bisa cu, contrario na loke Hues y Fiscal ta interpreta, e no a bisa Hues Comisario cu lo hala su peticion aden. Fiscal a bisa cu e no a mira peticion pa interogacion. Segun abogado, tur cos ta draai rond di un declaracion so. Ningun di e sospechosonan a firma nan declaracion. El a señala cu e sospechoso a duna declaracion pero net loke el a bisa no ta aparece den procesverbaal. Polis ta pone sugestionnan cu no ta cuadra.

El a mustra cu N.T. a bisa cu a mira botonan pero den procesverbaal ta para cu e no a mira botonan. E abogado ta haya cu ta importante pa tin un bista bon cla di e caso aki. El a pidi Hues pa manda e caso pa Hues Comisario pa scucha tur sospechoso. Esaki mirando cu tur ta papia Spaño y no ta compronde nada di Hulandes y pesey no a firma nan declaracion.

Hues a remarca cu den e procesverbaal di Hues Comisario ta para cu abogado lo laga sa y e ta haya cu pakico awor ta bin cu esaki. Hues ta haya cu lo mester laga Hues Comisario sa di anterior cu lo no hala aden peticion.

TUR SOSPECHOSO TA PARA RIBA UN NO

Hues a bisa cu tur sospechoso a wordo interoga diferente biaha y tur ta para riba cu nan no tin nada di haci cu e caso. El a puntra abogado kico lo por bay spera cu nan lo bay bisa na Hues Comisario. Abogado ta comparti punto di bista di Hues pero ta haya cu mester tin claridad. Hues ta haya cu esey ta encera cu lo tarda masha hopi.

   Fiscal a bisa cu abogado mester a notifica na tempo cu lo kier haci investigacion y mester a haci un peticion na Hues Comisario. E ta haya cu ta obligacion di abogadonan pa a coopera cu interogacion. Desde Maart 2016 tin e decision cu ta interoga sospechoso den presencia di abogado. A yama abogadonan pa puntra si lo por interoga sospechoso den nan presencia pero nan a nenga. Mr. Illes a reacciona mustrando cu el a manda carta pa Hues Comisario.

FISCAL TA ADVERTI CU LO BAHA PISA

Fiscal a bisa cu no por bay culpa Ministerio Publico cu no a scucha e sospechosonan. Ta trata di 365 kilo di cocaine. Ta un biaha so a interoga e sospechosonan. E agentenan ta papia Spaño y ta compronde cu e sospechosonan no ta firma algo cu nan no ta compronde. Fiscal a bisa cu e ta compronde e ponencia di abogado cu sospechoso lo a declara cosnan cu no ta para den procesverbaal. Na opinion di Fiscal, por scucha nan den Corte mes caminda tin traductornan cualifica.

Fiscal a bisa Hues cu mirando e interes di e caso y e hecho cu lo tin pensa exigi castigo pisa pa nan, lo ta bon pa scucha nan dilanti Hues Comisario.

Hues a manda e caso pa Hues Comisario y a pospone e caso pa mayan mainta.

CASO LO SIGUI OF NO?

Manera DIARIO a publica, abogadonan cu ta core turno pa atende cu sospechosonan di delito, a dicidi di haci nan accion mas pisa. Promer a cuminsa cu e accion di un siman largo no ta bay core turno. Despues a anuncia cu si no haya oido di Gobierno pa subi e pago di 900 florin pa 1800 florin, lo bay haci e accion mas pisa. E siman aki e abogadonan a dicidi cu nan no ta presenta den Corte pa casonan penal. Esaki ta conta pa tanto casonan penal bieu pendiente como casonan penal nobo.

   For di e posicion di e abogadonan por conclui cu ningun lo presenta den Corte. DIARIO lo informa lectornan kico a sosode den sala di Corte.

- Advertisement -

DUNA COMENTARIO

Please enter your comment!
Please enter your name here