Departamentonan concerni haciendo preparacion pa posibel calamidad

Publication: Thursday, 29 September 2016. Categoria: General

ORANJESTAD (AAN): Ministerio di Turismo, Transporte, Sector primario y Cultura ta responsabel tambe pa e departamento di Servicio Meteorologico di Aruba. Minister Otmar Oduber tin dialogo continuo cu Minister President y Bureau Rampenbestrijding pa desarayonan meteorologico. Mirando cu e situacion actual no ta uno ainda di calamidad, e ta keda responsabilidad di Meteo te ainda pa trece informacion na comunidad.

   Meteo ta den contacto cu gobierno  continuamente y ta saca boletinnan regularmente pa informa comunidad riba e mal tempo cu ta na caminda pa Aruba.

   A keda palabra cu Meteo lo ta e centro di fuente di  informacion pa evita cu tin confusion, mirando e cantidad di informacionnan cu ta circulando actualmente. Servicio Meteorologico di Aruba ta den contacto cu diferente otro servicio meteorologico di e regio, National Hurricane Center na Miami y KNMI.

   Tambe mester informa cu minister di infrastructura ya caba a reuni cu DOW cu na su turno ta haciendo trabaonan adelanta di limpiesa di rioleering y rioolnan hunto cu Santa Rosa cu a encarga cu e damnnan y matanan cu ta stroba etc, den caso cu haya hopi awacero.

   Minister president tabata den contacto cu Rampen bureau pa prepara pa si acaso e situacion mester yega na un punto di calamidad, cual punto no a yega ainda.

Leave a Reply