Home Editorial Editorial: Laga orguyo atras y acepta e man habri

Editorial: Laga orguyo atras y acepta e man habri

684
0
SHARE
- Advertisement -

jossy_mansur_pic    Mi a supone cu despues di tanto actonan di criminalidad un tras di otro y e invasion di malandronan cu e Minister di Justicia a tuma pasonan drastico pa atende cu e situacion cu no ta saliendo for di man mas, el a sali for di man caba. Pero mi speranza pa haya sikiera un tiki trankilidad back riba nos isla tabata en vano. E alarma ta sigui  y awor no ta stop di zona, a yega na e limitenan unda morto a cay, un señora respeta y stima pa hopi a worde asesina den su cas pa criminalnan cu no tin respet pa bida di hende.

    Mi a yega di bisa esaki caba e aña aki mes, definitivamente nos Ministro di Justicia no ta cumpliendo cu un parti esencial di su trabao. E no ta imaginativo; e no por pensa riba plannan concreto cu por yuda detene e ola di actonan contra Ley cu ta tumando lugar na Aruba. Ta absurdo spera cu su so, riba su mes, por pone un fin na e desorden cu ta existi. Pero, e por bin si cu plannan cu ta involucra cuerpo policial y Ministerio publico den accionnan mas visible y mas efectivo. Y si e cambio di actitud y accion tin mester di e apoyo di un cambio di Ley anto e cambio ey mester tuma lugar lo mas pronto posible.

   Minister di Turismo a yega di bisa diferente biaha cu lo por pone placa disponibel pa por yuda cu combatimento di criminalidad, pero e Minister di Justicia terco y cu un orguyo ridiculo a nenga, envez di wak cu e placa ta pa bienestar di henter nos isla parse cu e ta wak e ofrecimento di su colega como un ofensa. Señor Ministro di Justicia, por favor, laga e orguyo un banda y acepta e man cu ta worde brinda na bo persona, pasobra criminalidad ta afectando nos isla teriblemente y mester busca un solucion rapido. Un solucion unda tur man y ayudo ta bon bini pasobra esun cu ta gana ta henter pueblo y pueblo ta sclamando pa ayudo.

   Ya caba cuerpo policial ta ricibi ayudo di fondonan di turismo atraves di e Aruba Hotel & Security Foundation, pero mester mas y e Minister di Turismo a bisa na varios ocasion cu por pone mas fondo disponibel pa seguridad na Aruba.

  Otmar Oduber a demostra cu e ta un minister cu ta traha cu un vision y door di e vision aki mes e ta ripara cu mester extende un man pa combati criminalidad y evita cu esaki bay perhudica nos unico pilar economico te na e momentonan aki.

    Si tin problema of no ta gusta otro, por favor mantene esey entre boso mes, mantene como algo interno pasobra Aruba mester di un gobierno cu por traha hunto pa combati criminalidad al maximo. Laga e orguyo y muchachadanan un banda y acepta e man cu ta habri pa yuda cu e problema grandi aki cu ya caba a sali for di man.   Mientras cu esaki no pasa, e fiesta ta sigui y nos tur ta continua preso di e preocupacion cu tanto criminalidad a crea y ta sigui domina e noticianan di tur dia. Ta birando tempo pa un cambio!

- Advertisement -

DUNA COMENTARIO

Please enter your comment!
Please enter your name here