Grandeza di un politico ta ora cu bo por mira mas leu cu bo propio interes y mira interes di Aruba

Publication: Thursday, 29 September 2016. Categoria: General

ORANJESTAD (AAN): Mester reconoce esunnan cu a traha añanan largo pa logra cu tin e deal di refineria riba mesa. Ami mes tabata critico na diferente ocasion ora a papia di posibel reparterura di refineria. Pero mester ta sincero y elogia minister Mike de Meza pa trabao haci pa trece e refineria aki pa pais Aruba. Cu esaki mi ta kere mi ta contesta na un forma hopi cla e pregunta di señora Marisol Lopez-Tromp riba mi opinion di mi firma riba e ley, Minister Otmar Oduber a bisa.

   “Bo por tin un vision y pensamento cu bo ta kere 100% den dje y te dia di awe mi ta kere cu San Nicolas merece un hotel. Mi por compromete cu e pueblo cu mi lo sigui traha pa San Nicolas haya su hotel.” Uno no ta cera porta pa otro, e no ta facil y mas bien e ta dificil pa mira con pa crea un desaroyo turistico cu por tin influencia economico pa e area pariba di nos isla, minister Oduber a bisa.

   “Grandesa di un politico ta ora cu bo por mira mas leu cu bo propio interes por ta y mira e interes di pais Aruba y mira e interes di e region di San Nicolas den e caso aki”.

   Nos no ta para keto  y ta combersando tur dia ainda cu posibel desaroyadornan di hotel pa e area pariba di nos isla. Recientemente ta realisando un plan cu a cuminsa cu ne 4 aña pasa unda cu a bay New Orleans cu un delegacion grandi y a bisa cu loke sea e desaroyo cu bin na San Nicolas (hotel of refineria). Cu mester crea di San Nicolas e districto cu ta bira e enfoke di nos herencia y cultura cu por bira un atraccion turistico pa nos isla.

   Gobierno a inverti den dos museum na San Nicolas cual uno a habri algun dia pasa (watertoren) y dentro di poco lo habri Nicolas Store como e di dos museum na San Nicolas, por mira Art Fair cu tambe a tuma luga. algo cu a tuma luga pa prome biaha. Asina lo tin mas desaroyonan pa e area di San Nicolas cu ta cuadra cu e vision cu tin pa San Nicolas pa e ta e “Cultural and Heritage City”.

Leave a Reply