Home Hudicial Mañan sentencia ta cay pa dos sospechoso cu a asalta snack truck

Mañan sentencia ta cay pa dos sospechoso cu a asalta snack truck

0
0
SHARE
- Advertisement -

Fiscal a exigi 3 aña y 6 luna di prison pa nan

ORANJESTAD (AAN): Mañan mainta e hombernan R.E. y L.M. (20), mester presenta den Corte pa scucha nan sentencia. Luna pasa tratamento di e caso a tuma lugar caminda Fiscal a exigi 3 aña y 6 luna di prison pa cada un.

   Ambos ta worde sospecha cu riba 16 Februari 2015 a purba haci un asalto arma na un snack truck.

   Luna pasa, e sospechoso R.E., a nenga di sali for di cel pa bay Corte. Solamente L.M. a presenta. L.M. ta un Colombiano biba na Aruba. Hues a remarca cu anterior R.E. no a presenta y no tin abogado tampoco. Hues a dicidi di trata e caso toch.

    VIDEO DI ASALTO DEN CORTE:

    Durante tratamento di e caso, L.M. a keda para riba cu e no tin nada di haci cu e caso. El a admiti di tabata na e snack truck y a come pero despues a bay. Hues a bisa cu lo pasa algun imagen di e video di seguridad di e snack truck. Por a mira cu L.M., R.E. y otro dos persona tabata sinta na e snack truck ta warda cuminda. Despues di a come nan a bay.

Despues di un rato, un persona a presenta cu cara tapa cu un t-shirt y un arma den man ta mustra den direccion di esnan den e truck. Hues a mustra cu e t-shirt cu e asaltante tin bisti, ta e mesun cu L.M. tabatin bisti y e jeans ta parce tambe ora e tabata eynan promer. E di dos asaltante ta mesun parecido cu R.E. cu tin dreadlogs.

Hues a bisa tambe cu e keds cu e promer asaltante tabatin bisti, Polis a haya na cas di L.M. Tambe por mira cu e asaltante tabatin e mesun color di boxer cu loke L.M. tabatin bisti rato promer cu a mir’e ta come. Hues a mustra cu e persona R.E. tambe por a reconoce pa su zapatonan y dreadlogs cu ta tapa. Ariba e video por mira con nan a yega bay riba esnan den lugar.

   L.M. ta keda para riba cu e persona no ta e. Fiscal a mustra cu e homber M. cu a come cu nan a bisa cu L.M. ta un persona peligroso y ta cana arma y ta reconoce L.M. como un di e asaltantenan.

   L.M. a reacciona mustra cu e homber M. cu ta bisa cu L.M. ta un persona peligroso, ta pasobra e no kier pa L.M. anda cu su yiu muher pasobra L.M. tabata deteni como sospechoso di un asalto.

L.M. a bisa Fiscal pakico no ta confronta M. cun’e. El a bisa Hues cu el a pidi pa esey pero Fiscal no ta haci nada.

    EXIGENCIA DI FISCAL:

    Fiscal a bisa Hues cu dos biaha un empleado a worde maltrata y tur dos e asaltantenan a core bay. E empleadonan ta reconoce e asaltantenan como esnan cu rato promer a come na e snack truck. E promer cu a reconoce ta R.E. Tambe ta reconoce L.M.

Na opinion di Fiscal, apesar cu ambos sospechoso ta desmenti, tin suficiente prueba. El a mustra cu e empleadonan a mira nan y a reconoce nan. E empleado cu a worde maltrata dos biaha, a bisa cu el a mira e pistol y cu e asaltante ey a dal’e cu e pistol y despues a dirigi e arma riba e empleadonan. E empleadonan a core bay. E empleado aki a bisa cu el a reconoce nan como esnan cu un rato promer a come eynan. Nan a bay cu e mesun auto cu tabata esun cu nan a bin come cun’e.

Fiscal a bisa Hues cu e incidente a sosode mas o menos 2’or di marduga. Segun testigo, R.E. tabatin su man bou flanel pa laga mustra manera e tambe tin un arma di candela. Recherche despues di a studia e video di seguridad ta conclui cu e dos asaltantenan ta dos di e cuater personanan cu promer tabata eynan ta come.

Fiscal ta haya legalmente proba cu e duo aki a purba asalta e snack truck. Fiscal ta haya cu L.M. ta e promer asaltante cu tabata arma cu un pistol. R.E. tabata esun di dos cu tabatin man den sweater pa laga mustra cu e tin arma.

Fiscal a bisa cu e ta tene cuenta cu L.M. no tin carchi di castigo. R.E. si tin carchi di castigo, entre otro di a mata hende y otro casonan serio. Segun Fiscal, door cu e empleadonan a core bay cu e placa, e asalto no a keda realisa. Casonan asina ta causa inseguridad. Esaki ta afecta turismo tambe. El a exigi 3 aña y 6 luna di prison pa ambos.

A keda palabra cu mayan mainta Hues lo dicta sentencia. Ta di spera cu R.E. lo bin e biaha aki si pa scucha su sentencia. DIARIO lo informa lectornan kico e decision di Hues ta.

- Advertisement -

DUNA COMENTARIO

Please enter your comment!
Please enter your name here