Home Politica Mester balansa entrada minimo cu salario minimo trahando riba factornan di influencia

Mester balansa entrada minimo cu salario minimo trahando riba factornan di influencia

2
0
SHARE
- Advertisement -

Eddie Ras di PDR:

EDDY RASORANJESTAD (AAN) —  E miembro di Partido Democracia Real, señor Eddie Ras a referi na e balansa cu mester tin entre salario minimo y entrada (bestand) minimo cu un persona, of un famia mester pa cubri su gastonan di subsistencia.

Sr. Ras a señala pa Matutino DIARIO, cu pa logra e balansa aki mester traha riba e factornan cu ta influencia e entrada minimo.

“Bestand minimo ta e suma mensual neto pa cubri e costo di bida basico. Den un comunicado di CBS di Juli 2016, pa un persona so ta 2.068 florin y pa un famia di dos adulto y dos yiu ta 4.348 florin.

Un luna tin un average di 4.3 siman. E bestand ta señala cu pa siman, e bestand minimo pa un persona adulto ta 477.60 florin, loke ta nifica pa dia 68.03 florin”, señor Eddie Ras a indica.

El a agrega cu e empleado cu gana salario minimo ta bin cas cu mas of menos 1.626.55 florin neto pa luna.

Segun sr. Ras, e cifranan ta mustra cu entre bestand minimo, neto y salario minimo tin un diferencia di mas of menos 441.24 florin.

Ras a bisa cu e personanan aki tin cu traha extra pa por cubri nan necesidadnan di casi henter un siman. Esaki ta e situacion di un adulto si yiu pa cria.

“Pa trece un mihor balansa entre salario minimo y entrada (bestand) minimo, mester traha riba e factornan cu ta influencia e entrada minimo y pa medio di e rapport di CBS por mira cu tin diez factor cu ta influencia esaki, y nan ta: cuminda y bebida, paña y zapato, gastonan di vivienda, accesorionan pa cas, salubridad, transporte, comunicacion, educacion, recreacion, cultura y desaroyo, bienes y servicionan”, sr. Ras a trece dilanti.

El a referi tambe na e hecho cu Aruba nos tin un macuto basico cu ta consisti di diesun producto cual prijsnan ta wordo stipula y controla pa gobierno. E productonan aki ta: aroz, hariña, sucu, cuminda y lechi di baby, coffie, tee, margarina, manteca, lechi puiro, y lechi likido pa coffie.

“Prijsnan cu tambe ta wordo calcula pa gobierno ta: pisca, galiña, webo y pan blanco. Door di compara e factornan cu ta influencia e bestand minimo y e canasta basico, por mira e motibo di con e diferencia entre salario minimo y entrada minimo, ta casi un siman extra di trabao”, Ras a acentua.

E hecho cu Aruba su productonan ta wordo importa, ta haci cu si prijs di e producto mes of di transporte subi den exterior, e aumento aki ta bay influencia e entrada minimo.

“Aki na Aruba, pa por reduci e bestand minimo por amplia e macuto basico of baha e impuesto riba e factornan cu ta influencia e entrada minimo.

  “Locual mester ta conciente di dje ta cu cualkier decision cu wordo tuma pa reduci entrada minimo, gobierno mester eherce un control fuerte riba su entrada y su gastonan”, sr. Eddie Ras a remarca.

Esey ta haci, el a agrega, cu prome cu gobierno traha pa reduci e entrada minimo of otro proyecto, mester drecha e situacion financiero-economico di nos pais.

Si no traha prome riba e aspecto financiero- economico, como gobierno bo ta maneha un pueblo na un manera iresponsable. “Pasobra sin control di entrada y gastonan ta mescos cu crea debe. Sin control e oportunidad pa gasta mas cu bo entradanan ta grandi. Vivienda ta un di e factornan cu mas ta influencia e entrada minimo y riba esaki lo mi bin e siguiente biaha mas detaya. Pa medio di trece un mihor balansa entre salario minimo y entrada minimo, como gobierno bo ta brinda comunidad un mihor calidad di bida socialmente” Eddie Ras a conclui.

- Advertisement -

DUNA COMENTARIO

Please enter your comment!
Please enter your name here