Home General Prome Minister Eman: A tuma e pasonan necesario pa suministra comunidad sosten

Prome Minister Eman: A tuma e pasonan necesario pa suministra comunidad sosten

0
0
SHARE
- Advertisement -

Mayoria di departamento ta cla pa atende efecto di e tormenta

A tuma e pasonan necesario pa suministra comunidad sostenORANJESTAD  (AAN):   Prome Minister Mike Eman hunto cu Minister di Salubridad Publico Dr. Alex Schwengle, diferente instancia, manera Rampen Bureau, Brandweer y Alto Comisario di Polis Dolfi Richardson a duna un conferencia di prensa ayeranochi 8’or na Bestuurskantoor relaciona cu e “Tropical Storm Warning” cu tin den nos region.

   Mester enfatiza cu ta trata di un tormenta tropical y no un horcan. Sin embargo ta importante pa tin precaucion pero no mester crea panico, Premier Eman a subraya. Tur hende mester sigui di cerca e informacionnan y e ultimo boletinnan di Departamento Meteorologico di Aruba.

    E organizacionnan mester traha optimalmente pa seguridad di e comunidad. Nan a tuma e pasonan necesario pa suministra comunidad sosten, e mandatario a bisa.

    Awe Diahuebs 8or di mainta lo tin un reunion cu esnan concerni pa sigui cu e preparacionnan. Den transcurso di dia lo sigui cu e reunionnan. Un di nan lo ta 10’or cu e 30 cluster concerni.

    E efectonan di e tormenta lo por wordo sinti awenochi pero no ta conoci cuanto tempo nan lo prevalece.  Tur esey ta haci importante pa keda sigui e actualizacionnan di parti di Meteo, Prome Minister a indica.

   Di parti di  DOW ta haciendo rioolnan limpi pa preveni inundacion. Hospital, Ambulance ta trahando internamente. Lo tin varios ambulans den diferente post disponibel den caso necesario.

   Tin palabracion cu sector priva, gasolin stations pa duna cooperacion. Companianan priva cu tin eventonan publico a pidi nan pa cancela esaki pa seguridad di un y tur.

    Segun Eman nan ta den contacto cu otro islanan manera Bonaire y Corsow pa sigui di cerca nan situacion.  Tabata tin te hasta potretnan falso (bieu) a circula di Bonaire, Eman a bisa. Cu esaki mester tene cuidao pa no crea panico.

   Di parti di Brandweer a wordo informa cu nan a bin ta prepara cu otro organizacionnan. Si lago mester pasa mester yama 911 (Emergencia) of 100 (Polis).

   Na momento cu cuminza sinti efectonan di e tormenta y den caso cu algo sosode por yama e numbernan aki. Yama numbernan aki ora mester yama. No yama si no ta necesario.

    Mayoria di e departamentonan ta cla. Nan tin tur nan cosnan in place pa por haci e trabao necesario.

    Di otro banda, Alto Comisario Dolfi Richardson a expresa cu mester tuma e medidanan necesario den cada cas pa ta safe.  Cuerpo Policial a haci su preparacionnan pa tene suficiente personal disponibel.

   Tin e parti di trafico cu nan ta bay tene cuenta cune. Den caso cu lo mester realiza algun evacuacion lo informa comunidad debidamente.

    Entrante awe mainta tur polis lo ta disponibel. Ta pidi comunidad pa sigui cu e instruccionnan cu Polis lo por duna den e dianan aki, Richardson a enfatiza.

    HOSPITAL, IMSAN, DESPA, Wit Gele Kruis, docternan, Cruz Cora, Ambulans, remedi, material medico, tur esaki a wordo regla y palabra, Sharline Koolman di Departamento di Salud Publico a señala.

   GKMB tambe ta prepara pa loke ta e efectonan cu e yobida por trece cune. Departamento di Higiene y Veterinarie Dienst tin nan afspraaknan haci, Koolman a agrega.

     Finalmente,  Prome Minister Mike Eman a informa cu un peticion a ser haci na Marina di Reino pa duna asistencia den caso necesario.

      Un remarca special el a haci pa cu e situacion di lama ya cu experiencia ta mustra cu lama ta bira bruto maske e tempo ta pasa leu di nos isla. E olanan ta bin cu corientenan straño cu por afecta cualkier embarcacion. Tene cuenta cu esaki.

   Awe den transcurso di dia, manera ta hay’e ta necesario, lo bolbe tin un update despues cu e reunionnan di mainta tuma lugar, Minister Presidente a indica.

- Advertisement -

DUNA COMENTARIO

Please enter your comment!
Please enter your name here