Home Hudicial Fiscal a exigi 12 luna di prison pa e pareha

Fiscal a exigi 12 luna di prison pa e pareha

1
0
SHARE
- Advertisement -

A purba trafica casi 1 kilo di cocaina scondi den tasnan

ORANJESTAD – E homber R.R. y e dama E.H. ayera mainta a presenta den Corte pa e caso penal cu Ministerio Publico a cuminsa contra nan. Tur dos a wordo haya culpable di traficacion di droga y Fiscal a exigi 1 aña di prison pa cada un. Hues a keda di studia e caso y otro luna lo tin sentencia.

ACUSACION

Fiscal a bisa Hues cu e acusacion contra e pareha ta cu riba 30 April 2016, nan a exporta cocaine. Miembronan di Douane na aeropuerto a detene nan na momento cu nan kier a viaha pa Canada.

TRANSPORTA COCAINA

Hues a mustra cu nan a declara cu nan tabata bayendo Canada y nan a wordo ofreci 3 tas pa bay hiba. Douane a check un tas door di bora y haya cocaine. En total casi 1 kilo di cocaine a keda confisca. R.R. a bisa Hues cu el a haci un fabor pa un conoci. Hues a bisa cu esey ta mustra exportacion di cocaine. Hues a bisa cu tin declaracion di un dama V. cu ta bisa cu R.R. a bis’e cu pronto e lo mester haci un viahe pero no kier a bisa na unda y cu e lo mester haci un side job pa por financia e viahe. Hues ta haya cu e combersacion aki ta duna e impresion cu R.R. lo tabata bay transporta droga.

R.R. a bisa Hues cu nunca el a mira V. El a bisa cu el a bisa Recherche cu nunca el a mira V.

E.H. a bisa cu V. no ta biba cu nan pa sa con nan ta spaar. Hues a remarca cu nan ta hayando onderstand y nan tin 4 yiu, con por resta placa pa spaar. Segun E.H. e tabata haya placa tambe pa e yiunan.

Hues a puntra R.R. si el a check e tasnan. Segun R.R., el a mira den e tasnan pero no a mira nada. El a bisa cu ta tasnan di marca cu e conoci a bis’e hiba y cu e lo mester duna e persona su ruman na Canada. Hues a puntra si R.R. no ta haya esey straño cu e mester hiba tasnan bashi. Hues a sigui bisa cu R.R. sa cu nunca mester acepta cos di hende pa hiba.

E.H. a bisa cu e no tabata sa di nada y e ta sinti hopi malo di loke a sosode. Segun E.H., el a paga e pasashinan y a rabia pasobra el a perde asina hopi placa. Hues a remarca cu R.R. ta papia cu ta un conoci pero no ta bisa nada mas di dje. El a bisa cu e conoce e persona J. pero no a pensa cu tin algo malo. Hues a puntra R.R. si e no a sinti e tas ta mucho pisa. Miembronan di Douane a constata cu e tasnan tabata mucho pisa y pesey a bay bora nan y haya droga scondi. Segun R.R. e no a ripara cu e tasnan ta mucho pisa pero si a haya un holor straño.

Nan tabata pa bay keda 1 siman na Canada y segun E.H. nan tabatin 500 dollar cash mientras cu R.R. tabatin un cheque pa haya pero no a haya esey na tempo. El a bisa cu su mama lo cobra e cheque y manda e placa p’e.

EXIGENCIA DI FISCAL

Fiscal a bisa cu e ta haya legalmente proba cu e pareha a transporta droga. Nan a wordo deteni na aeropuerto despues cu nan a check inn. A haya tres tas den cual a haya cocaine. Muestranan a wordo manda Laboratorium y a constata cu tabatin 985,9 gram di cocaine en total.

Fiscal a bisa cu e ta haya e declaracion di E.H. y R.R. dudoso. Na opinion di Fiscal, awendia tur hende ta check cosnan hopi bon promer cu haci hende fabor. El a mustra cu hopi ta sali publica cu ta detene hendenan cu droga na aeropuerto. El a bisa cu e no ta kere e storia financiero di e pareha. Na opinion di Fiscal, cu solamente 500 dollar cash no ta suficiente pa nan estadia. Ademas R.R. ta bisa cu e lo mester haya un cheque y su mama lo manda e placa p’e. Fiscal a bisa Hues cu e no ta kere nan declaracion.

Fiscal ta haya cu tin suficiente prueba cu nan a exporta cocaine. Fiscal a bisa cu ta un caso serio. Droga ta causa hopi miseria na mundo. Ta casi 1 kilo di cocaine a keda confisca y esaki ta hopi droga. El a bisa cu E.H. a keda 10 dia sera y R.R. 26 dia. Despues a laga nan liber.

Fiscal a mustra cu segun e maneho di Ministerio Publico, pa promer biaha mester exigi 12 luna di prison ta exigi. Fiscal no ta mira motibo pa desvia di e maneho aki. El a exigi 12 luna di prison pa nan dos.

ABOGADO

Mr. Mohamed a bisa Hues cu el a papia hopi cu R.R. y awor el a realisa cu el a wordo usa. E ta haya cu R.R. no a hinca E.H. den e asunto di fabor aki. Pa ley esaki ta transporta droga y ta referi na decision di Hues. E abogado ta haya cu E.H. no tin nada di haci cu e asunto di transporta droga. El a bisa cu Fiscal ta papia di situacion financiero pero no tin ningun prueba cu esey ta mustra cu E.H. ta envolvi. No tin ningun prueba cu E.H. tabata sa di e tasnan. El a bisa cu R.R. a controla e tasnan y no a mira nada sino a haya holor manera camfer.

Hues a sera tratamento di e caso y a bisa cu e ta bay studia e caso bon y dia 17 November 2016 pa 8.15 di mainta lo tin sentencia.

- Advertisement -

DUNA COMENTARIO

Please enter your comment!
Please enter your name here