Home Policial Flex Team di Cuerpo Policial a logra preveni crimen

Flex Team di Cuerpo Policial a logra preveni crimen

0
0
SHARE
- Advertisement -

Diferente detencion tumando luga

ORANJESTAD(AAN)—- Flex Team di Cuerpo Policial ta patruya continuamente den diferente area y na diferente ora, y nan rol den e area di prevencion ta dunando su resultadonan.

Durante di e siman di dia 3 pa 9 di october ultimo, nan a efectua 110 control y a detene 3 persona.

Flex Team ta mantene rutanan pa patruya cu ta inclui algun luga fiho y nan ta keda agrega y cambia nan rutanan basa riba  indicacionnan cu un of mas area of bario ta of por bira un luga di risico halto pa diferente tipo di crimen.

Durante e periodo menciona, nan a traha riba kibra e patronchi di aglomeracion di hende na cierto lugarnan conoci como puntonan unda cu dificultadnan por presenta, manera e areanan rond di Manuelito’s, Circle-K, Hotel Bacarat, y e casnan social di Noord, Madiki, y Sero Patrishi.

Ademas e controlnan basa riba horario ta sigui tuma luga na De Olde Molen, Lekker, y Cas Casuela, pa percura pa e negoshinan cumpli cu nan ora pa cera, y pa esunnan cu tabata p’aden tuma caminda pa cas mas lihe posibel.

Relaciona na situacionnan cu a envolvi uzo di arma di candela algun tempo pasa, Flex Team ta mantene Canoastraat, Corvetstraat y area di Budweiserbar riba nan ruta.

Den e area di Budweiserbar ta keda controla pa e presencia di hobennan conoci como bendedornan di droga.

Eagle Beach ta keda un lugar unda diferente grupo ta topa den oranan di anochi; nan ta consumi bebidanan alcoholico y ta toca muziek duro, particularmente riba diadomingo anochi. Polis ta mantene ordo door di controla cu e gruponan ta mantene nan muziek na un volumen acceptabel te cu 11’or di anochi. Si nan no cumpli cu un volumen abao di muziek, polis ta exigi pa nan bay for di e luga.

Flex Team tambe ta pasa controla e parkeerplaats di The Village. Aki diferente grupo ta keda  riba e parkinglot y ta bebe bebida alcoholico. Polis ta pidi nan pa bay for di e lugar y si tin cualkier sospecho cu algo contra ley ta tumando luga, polisnan ta efectua controlnan riba e personanan aki.

Detencion Rama y Hoek

Durante e evento Urban Jungle na Centro Libertador Betico Croes, miembronan di Flex Team a topa cu un auto, modelo Toyota Altezza, cu tabata falta su capa di motor y bumper. Den e auto sinta a topa G.E. Rama, kende ta un conoci di polis,  y cu a laga sa cu e ta cuidando e auto pa su doño, X. A. Hoek.

Na rand di un stoel den e auto a haya un machete y consecuentemente a laga e doño sa cu ta bay listra e auto completo. Durante e control a topa cu un pipa traha na man, shete saco cu un cantidad di yerba cu ta parce marihuana, dos artefacto pa mula marihuana y un pochi cu yerba cu parce marihuana.

Flex Team a detene tanto Rama como Hoek, inmediatamente, riba dia 9 di oktober basa riba e ley di droga (landsverordening verdovende middelen).

Detencion Gonsalves

Na e mesun evento unda a detene Rama y Hoek, e hefe di siguridad di e evento a acerca polis pa asistencia debi cu un hoben kier a drenta cu un “boksbeugel” y un pochi di glas cu un cantidad di yerba cu parecido di marihuana.

El a core bay for di siguridad, pero un rato despues siguridad a mir’e ta canta riba stage. Siguridad a entrega loke nan a haya na polis, y a indica na miembronan di Flex Team kende e hoben Gonsalves ta. E hoben a wordo deteni.

Otro obhetonan tuma den beslag.

Durante e periodo menciona Flex Team a haya y tuma den beslag den un auto durante controlnan rutinario: cantidadnan chikito di marihuana, algun piedra di cocaina, skernan, cuchionan, machete, y artefacto pa mula marihuana.

- Advertisement -

DUNA COMENTARIO

Please enter your comment!
Please enter your name here