Home General Gobierno a saca su huña contra nombramento di Alfonso Boekhoudt como Gobernador

Gobierno a saca su huña contra nombramento di Alfonso Boekhoudt como Gobernador

1
0
SHARE
- Advertisement -

Mientras pueblo ta feliz cu su nombramento

Gobierno a saca su huña contra nombramento di Alfonso Boekhoudt como GobernadorORANJESTAD (AAN)– E informe cu a cuminza plama Diabierna atardi, a laga hopi hende na Aruba completamente babuca y casi no por compronde e actitud infantil aki.

   Recien a sali na cla, cu Hulanda a aproba pa Alfonso Boekhoudt bira e Gobernador nobo di Aruba entrante 1 Januari 2017.  E decision mientras tanto a wordo firma caba tambe door di Rey Willem Alexander.

   Un persona bon para den su zapato, corecto, bon vision, hopi intelectual, ta algun di e puntonan cu a pone hopi hende na Aruba, for di diferente partido politico, aplaudi esaki.  Ademas, e ta Ministro Plenipotenciario di Aruba na Den Haag, pues e ta un persona confiable di e partido actual den gobernacion tambe.

   Pero tur esaki a haya un sabor amargo, ora cu Diabierna a bin haya sa cu Gobierno keto bay manera un mucha malcria, ta zapatea y kier declara guerra contra e decision aki di nombra Boekhoudt pa ta representante di Cas Real na Aruba.

   Gobierno su punto principal ta cu Boekhoudt no tabata at all riba nan ‘radar’ pa bira Gobernador.  Y nan ta haya cu e Ministro Plenipotenciario a actua tras di nan lomba, ora cu el a wordo acerca pa Den Haag pa por ocupa e puesto ey.

   Pues, Gobierno ta pensa cu Boekhoudt no tabata fiel na Oranjestad… y mas bien fiel na Den Haag.  Y cu nan a haci palabracion cune pa e no acepta e oferta, pero el a haci esey tog.

   Y pesey nan a tuma e decision den fin di siman, pa exigi Alfonso Boekhoudt pa termina su funcion como Ministro Plenipotenciario entrante Diamars 1 di November venidero.

   E decision aki, inmediatamente a laga pueblo babuca.  Pasobra esaki ta parce di ta un persecusion contra e Gobernador nobo .

   Pueblo ta haya e escogencia di Alfonso Boekhoudt como fabuloso.  Ta esnan cercano di Gobierno so ta den desacuerdo cu esey.

Ayera mainta, durante un reunion formal di Conseho di Minister, a dicidi den forma unanime, cu ta kibra confianza den Drs. Alfonso Boekhoudt como Minister Plenipotenciario di Aruba na Hulanda. E decision aki ta drenta na vigor desde 1 di november 2016, asina un fuente bon na altura a sigura nos. A purba tur forma pa haya confirmacion di Gobierno, pero keto bay no por haya un confirmacion, aunke nos fuente ta 100% sigur.
Segun ta wordo comenta den seno publico, Alfonso Boekhoudt a hinca su mes den un posicion masha vulnerabel mes, ora cu tras di lomba di Gobierno a negocia cu Hulanda pa e funcion di Gobernador di Aruba. Parce cu Hulanda a acerk’e y aunke cu Gobierno di Aruba a bis’e cu e NO ta nan candidato y cu nan ta prefera pa e keda den e funcion di Minister Plenipotenciario, toch el a opta pa acepta e “deal”.
Segun ta wordo comenta,  durante e reunion di Conseho di Minister a cay palabranan fuerte, manera “traicion”, mustrando asina cu Boekhoudt a haci bon uzo di su posicion, su contactonan y su red di trabou, door di ta representante di Minister President na Hulanda, pa por a regla su mesun funcion y futuro.

Segun e informenan no confirma, esaki sin duda no a cay den bon tera cerca Gobierno di Aruba, cu a haci un apelacion riba dje pa no acepta e “deal” cu Gobierno di Hulanda kier cera cune tras di lomba di Gobierno di Aruba.
Desde su nombramento diabierna siman pasa, Prome Minister Eman a cancela tur su reunionnan, incluyendo e acto protocolario di Citgo y Refineria di Aruba diabierna ultimo. E pregunta ta cu ki sosten Alfonso Boekhoudt ta asumi su funcion awor como Hefe di Gobierno di Aruba y representante di Hulanda.

Segun e fuente, cu e decision aki pa kita Boekhoudt for di su funcion di Minister Plenipotenciario, Gobierno di Aruba ta manda un señal cla bek pa Hulanda, relaciona cu metemento den politica local di nos pais.

   Pues di 1 November 2016 te cu 31 December 2016, Alfonso Boekhoudt lo ta sin trabao.  Pero entrante 1 Januari, e lo ta ocupa e puesto di Gobernador, cu ta representa e gobierno di Reino.

   Gobernador ta representa Cas Real na Aruba y esaki ta pone cu en realidad, Alfonso Boekhoudt na 2017 lo ta e hefe di e gobierno di Aruba.

   E reaccionnan ricibi di Diabierna atardi y anochi, tabata mustra comosifuera cu loke Conseho di Ministronan a haci ta un “muchachada”, “persecusion”, y un show “ridiculo” di parti Gobierno.

- Advertisement -

DUNA COMENTARIO

Please enter your comment!
Please enter your name here