Home Politica Minister Eman no a logra scapa cara di e berguensa rond di...

Minister Eman no a logra scapa cara di e berguensa rond di e nombracion di Gobernador

0
0
SHARE
- Advertisement -

Parlamentario mr. Xiomara Maduro:

Minister Eman no a logra scapa cara di e berguensa rond di e nombracion di GobernadorORANJESTAD (AAN): Segun Xiomara Maduro di partido MEP, e siman aki ta habri cu un reunion di vragenuur na Parlamento den cual Minister Eman mester a bin contesta preguntanan haci pa Parlamentarionan riba e nombracion di e Gobernador nobo.

E meta di e reunion aki tabata pa crea e percepcion cu Minister Eman a haci todo por todo pa defende e interesnan di e Pueblo di Aruba cu un biaha mas a pasa den un falta di respet di parti di Hulanda.

    Di un banda e ta un berguensa sigur cu Hulanda no a bay di acuerdo cu e nombramento di un candidato proponi pa Gobierno di Aruba, pero di otro banda e ta bisto tambe cu ta door di e mesun fayo di Minister Eman, Hulanda a haya tur chens di pasa wals riba nos, nombrando un otro candidato di su preferencia contra e procedura cu normalmente ta worde usa. Cu e reunion di vragenuur, Minister Eman kier a kita e berguensa aki cu el a pone nos Pais pasa aden, for di su cara. Pero e mandatario no a logra.

   E fayo ta di Eman:

   Durante e reunion a bira bisto cu Minister Eman mes a faya y e mes a duna Hulanda tur chens pa wals riba nos. E mandatario mes a admiti cu el a scohe pa evita problema y a dicidi di acepta e nombracion di e Gobernador nobo den interes di Reino. Pues cu otro palabra Minister Eman no a para pa defende e interes di Aruba, pero a djies tira serbete den ring pa cara di Reino. Tristo ta cu e cara di Aruba mes cu e mester defende como nos Minister President, Minister Eman a laga atras tur susha door di su mesun eror. Na nos opinion solamente ora cu bo sa cu bo ta fout y cu bo ta malamente perdi, bo ta actua asina. Pues ta bisto cu Eman mes a faya y a pone cu e nombracion di Gobernador a bay den e forma aki.

   Si bo deha, otro ta dicidi pa bo:

   Minister Eman tabata sa masha bon cu Hulanda tabata tin problema cu su lista proponi. Minister Eman tabata sa tambe cu Hulanda tabata kier a mira sr. Boekhoudt riba e puesto ey. Pero e mandatario a scohe pa no haci nada y duna Hulanda tur chens pa haci deshaci. Den e asuntonan aki ta masha simpel, si bo deja, otro ta dicidi pa bo. Y esaki ta locual Minister Plasterk a splica na Tweede Kamer na Hulanda cu na momento cu el a wak cu Aruba no tabata tin fin pa bin cu un propocicion cu ta conta cu aceptacion, e Conseho di ministronan di Reino a dicidi di bin cu nan propio propocicion. Pues asina ta bira bisto cu Minister Eman mes a deja pa defende su lista y e mandatario no a haci nada pa sugeri un otro persona cu por conta conta cu e aceptacion di Aruba y Hulanda. Den un scenario asina ta Minister Eman mes a laga Hulanda haci deshaci.

   Eman no a logra scapa cara:

   Den e vragenuur Minister Eman a purba crea e percepcion cu el a lucha y a haci sacrificio grandi pa nos Pais. Pero for di su propio contestanan y informacion presenta ta sali atrobe na cla cu ta Minister Eman mes a faya y a duna Hulanda tur chens pa falta nos respet cu e nombracion contra costumber di e Gobernador nobo. Ta Minister Eman mes a pone e cara di nos Pais na berguensa y e reunion di vragenuur no a yude pa logra scapa su cara di e berguensa rond di e nombracion di e Gobernador pa nos Pais.

- Advertisement -

DUNA COMENTARIO

Please enter your comment!
Please enter your name here