Home Hudicial Muchanan di 14 y 15 aña dilanti Hues pa asalto arma den...

Muchanan di 14 y 15 aña dilanti Hues pa asalto arma den supermercado

0
0
SHARE
- Advertisement -

ORANJESTAD (AAN): Mayan mainta un trio, consistiendo di un hoben y dos mucha, a presenta dilanti Hues pa duna cuenta pa e delito serio cu nan a haci. Na Juli 2016 e trio aki a presenta caba dilanti Hues caminda despues di un intercambio di pensamento di abogado y Fiscal, Hues a bay di acuerdo cu e pensamento di Fiscal y a rechaza e peticion di abogado pa laga e muchanan liber.

   ASALTO ARMA RIBA SUPERMERCADO:

   E acusacion cu Fiscal a presenta contra e hoben N.P. y e muchanan S.F. y J.P. ta cu riba Diahuebs 10 di December 2015, nan a haci un asalto arma den un supermercado. Nan drenta cu cara tapa y cu arma di candela of algo parecido na un arma di candela y cuchiu. Nan a pone arma riba e personanan y grita nan “Drumi abou! Drumi abou! y a exigi placa. Nan a bay cu 500 Florin, carchinan di telefoon, paki(nan) di cigaria.

   Doño di e supermercado, un dama Chines, a presenta den Corte. Fiscal a bisa Hues cu e caso ta pro forma y cu e caso lo mester bay pa October 2016.

   DOS MUCHA TA HACI ASALTO ARMA:

   Fiscal a mustra cu tempo cu e asalto arma a sosode S.F.(15) y J.P.(14). Abogado mr. Arendsz a bisa Hues cu na April 2016 nan a worde deteni. Ambos ta menor di edad.

   E abogado ta haya cu Corte lo mester aplica ley di hubentud pa e muchanan aki y segun ley no por laga nan sera asina largo. Na opinion di abogado, for di e investigacion haci no por bisa exactamente si tabatin menaza. No tin imagen di video of grabacion di stem pa determina esey.

   El a pidi Hues pa laga nan liber. Na opinion di e abogado, ya caba nan a perde nan aña escolar. E ta kere cu si laga nan liber, lo no sacodi comunidad. Mr. Arendsz a menciona sentencia di Corte di Husticia na Rotterdam pa un caso similar o sea asalto riba un supermercado door di tres mucha. A duna nan castigo combina cu ta encera casi loke nan tabata sera caba. El a mustra cu school ta cuminsa na Augustus y e dos sospechosonan ta bayendo bon na school. Mayornan ta dispuesto paga mihor tino riba nan yiunan.

  Hues a remarca cu e mayornan no tey y con por tin siguranza cu nan lo bay wak mihor pa nan yiunan?. Abogado a bisa cu e mayornan tabata cerca dje pero casi tur dia nan ta bay bishita e muchanan y a acerca instancianan pa mira con por yuda e muchanan.

   Hues a puntra e sospechosonan con ta bayendo den KIA. Nan a bisa cu bon. Nan tin television y wega di video. F. a bisa cu el a haya bukinan pa studia di school. F. a bisa cu e ta dispuesto pa bay bou guia di Reclaesering. J.P. a bisa cu e ta sinti falta di su mayornan. Hues a puntra con nan por convence Corte cu lo no bay haci algo asina atrobe. J.P. a bisa cu e lo bay traha. Hues a remarca cu e por a haci esey promer di a haci e asalto. E tambe a priminti di lo bay bou guia di Reclasering.

   Hues a haci N.P. hopi pregunta y el a bisa cu el a caba enseñanza basico di EPB y ta un carpinte. El a bisa cu e lo por haya trabao cu su omo cu ta traha den construccion. El a bisa tambe cu via KIA el a pidi pa papia cu Reclasering pero nada ainda.

   REACCION FISCAL:

   Fiscal a bisa Hues cu e ta compronde cu nan ta hoben pero ta trata aki di un asalto arma. Tur esnan presente den e supermercado a pasa e susto di nan bida. Fiscal a mustra cu tin evaluacion haci riba F. cu ta mustra cu e chens di recidivista ta grandi mirando cu e ta usa droga y e situacion financiero dificil na cas. Esey tambe ta conta pa J.P. cu tambe ta confronta situacion na cas y presion di grupo cu e ta anda cun’e.

   Fiscal a bisa Hues cu e ta haya cu no por laga nan liber. Comunidad no lo compronde cu ta laga nan liber. Ademas, no tin garantia cu si laga nan liber nan lo no bay haci algo similar. Tin preocupacion den comunidad cu hubentud ta bay haci delitonan serio asina. Fiscal a pidi Hues pa rechaza peticion di abogado pa laga nan liber. El a pidi pa pospone e caso pa dia 28 October pa 9.30 di mainta.

   MUCHANAN NO TA BAY LIBER:

   Hues a bisa cu e ta rechaza peticion di abogado pa laga e muchanan liber. Hues ta haya cu nan mester keda sera mirando e delito serio. Na opinion di Hues, e muchanan aki no mester keda den KIA sino sigui studia. Mester percura cu nan lo haci algo. Hues a pospone e caso pa mayan 28 di October 2016. DIARIO lo cubri e caso y lo informa lectornan kico tur a pasa den Corte di Husticia.

- Advertisement -

DUNA COMENTARIO

Please enter your comment!
Please enter your name here