Home Hudicial Dos aña di prison exigi pa homber acusa di a forza un...

Dos aña di prison exigi pa homber acusa di a forza un colega di trabao tene relacion cune na trabao

3
0
SHARE
- Advertisement -

ORANJESTAD   (AAN)  – E Colombiano C. ayera mainta ta para riba cu ningun momento el a forza su colega, un dama di 18 aña, tene relacion sexual cun’e na trabou. Segun e sospechoso C., tur cos a sosode a base voluntario. Fiscal no ta kere e storia di C. y a exigi 2 aña di prison.

E abogado cu ta representa e victima a exigi algo mas cu 900 florin pa daño material y 15 mil florin pa daño inmaterial. Abogado di e sospechoso mr. Illes ta mustra cu e victima su declaracion ta dudoso y no ta haya cu por acusa e sospechoso pa a forza.

FORZA DAMA TENE RELACION

Fiscal a acusa e sospechoso C. cu riba 2 November 2015, el a forza un dama di 18 aña na trabou pa tene relacion sexual cun’e. Fiscal a mustra cu C. a sera un porta na lock y a ranca paña for di curpa di e dama y a tene relacion sexual cun’e na trabou.

Hues a puntra C. si e acusacion ta corecto. Segun C. e muher tabata kier relacion cune. E momento ey C. tabata trahando como supervisor di un compania. E victima tabata atende clientenan. C. a admiti di tabatin relacion sexual cu e dama na trabou. Hues a puntra si esey ta normal. Segun C. esey no e sa. E no sa si esey ta permiti na trabou. Ta asina cu C. a wordo kita for di trabou.

Aparentemente door di tabatin relacion sexual na trabou cu un colega di trabou, a kit’e pasobra esaki no ta permiti. Hues a mustra cu segun declaracion di un empleado, C. a puntra un di e trahadornan si tin camera di seguridad na trabou. Segun C. ningun momento el a papia di esaki cu un empleado.

Hues a mustra cu e victima a haci denuncia y a bisa cu pa un tempo caba C. tabata busca pa tin relacion sexual cun’e. Segun C. nan tabatin un relacion amoroso na trabou. Tin biaha nan tabata sunchi otro. Hues a bisa cu e victima a declara na Polis cu ora nan tabata den auto di trabou, C. lo tabata mishi cu su parti intimo y tabata sunchi. C. a desmenti esey.

Hues a puntra con por ta anto cu e dia ey tabatin relacion sexual. Segun C., e dia ey nan tabata sunchi y a bay asina leu cu a tene relacion sexual.

Hues a puntra con C. cu ta mas cu 30 aña, tin relaciona cu un hoben di 18 aña. Segun C. e ta mira e victima como un muher. Hues a remarca cu e no ta tene cuenta cu ta un colega di trabou y cu no por tene relacion sexual na trabou.

DEMANDA DI DAÑO

Abogado di e victima a presenta den Corte cu e psicologo cu ta tratando e victima pa mas cu 1 aña. E abogado a bisa Hues cu e demanda ta material y inmaterial. El a bisa cu e victima a keda 3 luna sin bay traha y cu e ta mas cu 1 aña bou tratamento di psicologo. Segun e abogado, tin chens cu e victima lo bay keda cu kehonan. E victima a keda afecta y esaki a afecta su relacion cu su pareha. E victima a keda traha na e compania. E abogado a demanda 15 mil florin inmaterial y algo mas di 900 florin material. El a menciona sentencianan caminda ta mustra con a condena daño inmaterial pa victima di violacion. E abogado a bisa cu no por bisa cu despues tratamento di psicologo, no lo bay tin mas keho. El a keda afecta. El a presenta tambe raport di psicologo. El a bisa cu e compania ta cubri gastonan di tratamento di psicologo.

EXIGENCIA DI FISCAL

Fiscal a bisa cu e ta haya C. culpable. El a mustra cu C. ta para riba cu tabatin relacion pero voluntario. Fiscal a splica cu pa casonan asina ta fastioso pasobra tin declaracion di e victima contra e declaracion di e sospechoso. Mester busca otro pruebanan cu ta duna peso na e victima su declaracion. Fiscal ta haya cu tin pruebanan di sosten. E victima a bisa cu C. a sera e porta na lock. C. ta admiti esey. Tin testigonan a bisa cu e victima a reacciona violento cu C. despues di e relacion sexual forza. Despues e victima a dicidi di conta un colega kico a sosode. E dia siguiente el a bay haci denuncia. Otro colega a bisa cu el a mira cu algo a pasa e victima cu no tabata actua normal mas. Tin testigonan a bisa cu e victima a bisa nan cu diferente biaha C. tabata molesti’e. Nan no a mira cu C. a sunchi of tene relacion. Fiscal ta haya cu tin suficiente prueba cu ta mustra cu C. a tene relacion cu e victima contra su voluntad.

Fiscal ta haya cu e sospechoso C. a tacha integridad di e dama. Fiscal a exigi 2 aña di prison. Pa loke ta e demanda, el a pidi Hues pa declara no admisibel e parti material. Fiscal ta haya cu no tin suficiente indicacion riba e suma aki. El a bisa cu e victima por cuminsa un caso civil. Pa loke ta e parti inmaterial, el a ta haya cu esaki ta aceptabel.

DEFENSA ABOGADO

Abogado mr. Illes a bisa Hues cu e acusacion contra su cliente ta basa solamente a base declaracion di e dama victima. Ta un hecho cu nan tabatin relacion sexual pero a base voluntario. Segun e abogado ningun momento C. a forza. Al contrario e victima mes a participa den e relacion sexual. Na opinion di e abogado, e testigonan ta bisa cu ta e dama a bisa nan cu C. a abusa di dje. E ta haya cu e declaracion di e victima no ta confiabel.

   El a menciona ley cu ta mustra cu no por condena un sospechoso solamente a base di declaracion di un persona. Un persona so no ta suficiente prueba. No tin suficiente prueba di sosten y pesey e ta haya cu mester declara C. liber.

E abogado a remarca cu ta straño cu e victima no ta corda ki dia e relacion sexual a sosode. E ta haya cu si ta algo dramatico, bo no ta lubida facil. E abogado a mustra cu e relacion a sosode dialuna y e  victima a haci denuncia te diabierna.

E abogado a mustra tambe cu e no ta kere cu un victima di abuso sexual lo bay comporta manera e victima esta cu e tabata tuma lift cu e sospechoso mes envez di nenga di bay of busca ayudo di otro. Tur esaki na opinion di abogado ta crea duda den e victima.

El a señala cu e victima su declaracionnan no ta consistente.  Tambe el a mustra cu tin un testigo a bisa cu el a puntra e victima pakico e no a bay haci denuncia na superiornan. E victima a bisa cu e no kier problema na trabou. E abogado a puntra pakico? Ta algo a pasa cune toch. E victima a laga sa si e sosode un biaha mas e ora si e lo bay na superiornan.

E abogado a bisa Hues cu e ta haya cu mester declara C. liber. Si acaso Hues pensa diferente, e ta haya e castigo exigi pa Fiscal exagera y tambe e demanda inmaterial di 15 mil florin. El a mustra cu den caso caminda mucha chikito a wordo abusa a demanda 7 mil florin. E caso di abuso di agente policial femenino e demanda tabata 6500 florin.

Fiscal a reacciona cu e hecho cu e victima no a bay haci denuncia serca superior, no kiermen cu su declaracion no ta confiabel. Door cu tin 18 aña e tabatin miedo cu e lo por perde su trabou. Abogado mr. Illes a remarca cu ta hustamente pesey ta cuestiona su comportacion. Si bo no a haci nada bo no tin miedo.

Hues a sera tratamento di e caso y a bisa cu e lo bay studia e caso y lo dicta sentencia dia 15 December 2016.

- Advertisement -

DUNA COMENTARIO

Please enter your comment!
Please enter your name here