Home Editorial EDITORIAL: DIARIO 36 Aña

EDITORIAL: DIARIO 36 Aña

245
0
SHARE
- Advertisement -

Jossy E. Mansur

Un vision di nos Maestro Jossy M. Mansur q.e.p.d.

JOSSITO MANSURCu sentimentonan mixto mi ta skirbi un editorial awe pa prome biaha y pa mi expresa e vision y e direccion cu famia Mansur kier pa matutino DIARIO, e arbol cu mi tata difunto a sembra 36 aña pasa y cu awe mi mama y mi rumannan a entregami e timon pa sigui traha riba e mata aki, pa e SIGUI florece.

Nunca mi a yega di skirbi un editorial den DIARIO, ya cu semper ta nos tata, nos mentor, nos maestro a haci esey y su editorialnan tabata acapara atencion di tur nos lectornan. Mi tata tabata skirbi un editorial cla y raspa y duna su opinion y conseho pa un of otro topico cu tabata importante na e momento ey. Pa hopi hende e editorialnan aki tabata un reflexion den nan bida diario, tanto pa esnan den nos comunidad y esnan den gobierno cu semper mi tata tabata duna su opinionnan y criticanan, pero na un forma profesional y cu tur gobierno tabata tum’e sumamente na serio, aunke e por tabata un opinion  negativo pa nan.

Awe ami a skirbi un editorial dirigi na nos lectornan, pa loke nan a y lo sigui significa pa nos semper.  Pa mi cuminza haci esey mi mester a sinta reflexiona y corda riba hopi di mi tata su editorialnan.

Nos famia pa mas di 20 aña caba tin e costumber di topa tur mainta na cas di mi tata pa bebe koffie y combersa. Un tras di otro, ami y mi rumannan tabata drenta den mi tata su oficina na cas pa pasa un rato den seno familiar y papia di un of otro suceso. Den nos combersacionnan, apart di papia tocante asuntonan familiar, nos tabata discuti temanan cu tabata importante na e momentonan ey sea politico, economico, social, criminalidad, educacion, sucesonan internacional, etc.

Loke nos a siña di nos tata durante tur e añanan ey ta pa balora Dios, bida, principio, balornan humano y respet. Pa nos tabata un satisfaccion y alegria cu nos por a comparti hopi informacion cu nos tata. Su consehonan, su atencion, su preocupacionnan, su visionnan, su amor incondicional cu e tabata tin pa nos tur, lo ta e arma cu lo yuda nos pa sigui lucha pa loke tabata su pasion pa mas di 36 aña cual ta e bienestar di Aruba.

 E bebemento di koffie tur mainta a keda, e union familiar a bira mas fuerte, y nos como rumannan y mi mama lo para fuerte pa sigui cu e lucha di mi tata pa informa pueblo na un manera objetivo y responsable atravez di DIARIO y mi ta kere cu mi tata lo guia nos aya for di den cielo pa nos por sigui cu nos bida, sin su presencia.

 Mi tata  semper tabatin un solo  proposito cu cada edicion di Diario: Informa pueblo di kico ta pasando riba nos isla. Aruba y su lectornan semper tabata su preocupacion y cu su DIARIO e tabata informa pueblo. For di situacionnan cu ta pasando den cada cas aki na Aruba te na sucesonan cu ta pasa rond mundo, DIARIO ta y lo keda e fuente number uno den noticia na Aruba.

Mi tata tabata stima y kere den su pueblo y tabata kier un Aruba mihor, un Aruba unda cada habitante ta feliz, por ta para bon economicamente y na unda bo por sinti e cordialidad y amabilidad di su hendenan atrobe. Unda cada hende ta conoce otro y cu tur hende ta bon bini akinan, pero semper y cuando cu nan ta respeta idioma Papiamento, nos leynan, y nos tradicionnan.

Mi tata tabata sinta analisa na un manera obhetivo tur suceso cu tabata yega na su oido y cu tabata afecta nos bida diario y tabata duna su opinion y conseho pa un Aruba mihor.

Mi ta convenci y ta kere fuertemente cu apoyo di mi famia, DIARIO y henter su personal lo sigui ta e prome den informa nos pueblo manera nos a haci durante 36 aña. DIARIO ta keda un corant obhetivo, skirbi pa nos periodistanan capacita cu ta skirbi na bienestar di pueblo.

DIARIO ta e number un, pasobra el a sigui un linea hopi simpel y basico  “Skirbi pa pueblo y informa nan e berdad”.

Nos a drenta tambe un rumbo nobo cu e presencia di CITGO. Esaki lo por resulta di ta algo grandi pa nos pais, e beneficionan por trece pa hopi aña entradanan economico cu gobierno y Aruba mester di dje pa bienestar di nos tur.

Si tur cos bay manera a wordo acorda, no tin pakico tin mas aumento di impuesto y mas atencion por wordo duna caminda, esta nos cuido medico, educacion, criminalidad etc.

Awe, cumpliendo 36 aña di existencia, Diario ta bolbe defini su posicion y esaki manera semper ta lucha pa e bienestar y futuro di nos isla.

Nos kier gradici tur e personal di DIARIO cu a para fuerte semper banda di mi tata y cu a defende cu orguyo e derechonan pa un Aruba mihor, y mi ta spera cu hunto nos lo por sigui ta e voz di e pueblo y manera nos lema ta “Berdad nunca a perhudica ningun hende, ningun causa, ni ningun nacion”.

Awe cu Diario a cumpli 36 aña di existencia y nos lo sigui cu e lucha cu nos a hereda for di mi tata. Cual ta su lucha pa e bienestar di Aruba.

Fisicamente mi tata a crea un bashi dificil pa yena,  pero su legado y guia ta sigui bibo y su recuerdo imborable.

- Advertisement -

DUNA COMENTARIO

Please enter your comment!
Please enter your name here