Home General Na Aruba tambe mester haci un estudio riba pobreza!

Na Aruba tambe mester haci un estudio riba pobreza!

12
0
SHARE
- Advertisement -

ORANJESTAD (AAN) – Awendia, den hopi pais tin estudionan ta wordo haci tocante pobreza, como cu ta un yamada di Nacionnan Uni, pa lucha contra pobreza.

Den algun pais nan ta relaciona un bahada chikito di pobreza cu e hecho cu parehanan awendia ta planifica, y famianan ta birando mas chikito, locual ta nifica menos gasto pa hogarnan cu, por ehemplo, ta biba di entrada minimo.

No obstante, ainda den famianan chikito, por tin pobreza debi cu desempleo ta aumentando na diferente pais cu situacionnan economico-financiero dificil, cu ta genera despido tanto den sector publico como den sector comercial.

Un alternativa cu ta wordo studia den seno di parlamento di algun pais di, por ehemplo, America Central ta baha inflacion y crea mas poder di compra door di reduci e prijsnan di productonan di consumo basico, y particularmente pa e poblacion di menos recurso.

Di e manera aki e famianan por biba cu e mesun entrada di salario minimo, pero nan placa ta rindi mas door di paga menos pa nan consumo, como tambe baha e tarifanan di servicionan fundamental, manera awa y coriente.

Pa hopi famia cu ta haya loke nan ta yama “ingreso autonomo” (trabao pa nan mesun cuenta) ta confrontando problemanan. E motibo tambe ta cu e materia prima cu nan tin cu adkiri pa traha, ta mas costoso. Por ehemplo, personanan cu ta bende cuminda for di nan mesun cas, snacks, bolo, of cosemento di paña, pelukeria, entre otro. Loke na Aruba nos conoce como “trabao informal”.

Pues un tema hopi interesante pa trata na Aruba tambe, aunke CBS cada diez aña den su censo ta haci tambe estudio di e promedio di entrada familiar, pero no directamente riba e factor “pobreza” cu no tin duda ta presenta den nos Isla feliz tambe.

Por ehemplo, boluntarionan cu semper ta haci un tremendo trabao pa e temporada di “back to school” y tambe na December, sea trahando macuto cu productonan basico pa esnan den mas necesidad, of colectando paña, etc., nan ta duna indicacion cu e pobreza ta creciendo na Aruba, pero no ta wordo mira pa e comunidad en general.

Hopi hende no kier pa otronan sa cu nan ta den necesidad y algun tempo pasa Gobierno mes tabata tin un discusion riba kico ta pobreza, si na Aruba tin pobreza real of no, y a keda di haci un sondeo, pero te dia di awe no a toca mas e tema. Aruba como pais miembro di ONU via Hulanda, mester haci e tipo di estudionan aki pa tambe yuda combati pobreza den nos mesun cas.

- Advertisement -

DUNA COMENTARIO

Please enter your comment!
Please enter your name here