Home Politica Oposicion ta sostene 32 mocion relaciona cu presupuesto pero no ta sostene...

Oposicion ta sostene 32 mocion relaciona cu presupuesto pero no ta sostene presupuesto 2017

0
0
SHARE
- Advertisement -

Parlamentario Melvin Tromp

ORANJESTAD    (AAN):  Ex lider di MEP durante di su carera politico, a yega di uza varios expresion cu awor ta cuadra cu e vision y actuacion di su partido cu el a laga den man di Evelyne Wever Croes.

Parlamentario Melvin Tromp di fraccion di AVP ta mustra c’un di e expresionnan aki ta bisa lo siguiente: “tin politico cu ta gaña muri pa mira cuanto hende ta bin nan entierO” y durante tratamento di presupuesto 2017, esaki ta net loke fraccion di MEP a haci, segun Parlamentario Tromp.

“Pa oranan largo miembronan di fraccion di MEP, esunnan cu a bin atende e reunion anto, a uza nan tempo pa haci politica, no solamente esey pero algun di nan hasta pa insulta y lansa acusacionnan sin sentido contra miembronan di Conseho di Minister, sin sikiera un rato para y papia na nomber di pueblo.

Na inicio di e di dos tanda di pregunta, lider di MEP a bay asina ley na haci uzo di su minuutnan pa presenta un asina yama programa di su partido pa proximo eleccion, lansando un serie di promesa sin sentido, papiando di drecha cosnan cu su partido mes a bay laga atras un desaster.

E falta di seriedad aki ta bisto pa henter pueblo di Aruba, caminda nos fraccion di AVP  a pasa simannan largo reuniendo cu  mas tanto Minister envolvi pa haya mas informacion posibel riba nan presupuesto y asina prepara nos mes den e miho forma pa e reunion.

Sinembargo miembronan di fraccion di MEP un biaha mas no tabata interesa den  cumpli cu nan obligacion y practicamente tur hende a ripara cu miembronan di e fraccion geel, cuminsando cu e lider Evelyne Wever Croes, practicamente no a habri e presupuesto pa nan mira of haci pregunta.

Ta un hecho comproba cu fraccion di MEP no ta interesa den bienestar di nos pueblo pero ta dirigi solamente den e direccion pa trata di yega na poder pa bolbe beneficia famia- y amigonan.

 

Un parti cu tambe a resalta riba e comportacion di miembronan di oposicion, principalmente di fraccion di MEP ta e hecho cu fraccion di MEP a entrega 13 mocion,  Andin Bikker di PDR a entrega dos mocion y miembro independiente Lopez Tromp a entrega un mocion pa consideracion di Parlamento.

En total presupuesto 2017 a conoce 41 mocion en total ya cu nos fraccion di AVP a presenta no menos cu 25  mocion pa Gobierno inclui den ehecucion di e presupuesto 2017 cu ta mustra e diferencia grandi cu tin.

Loke ta ridiculo di miembronan di oposicion ta cu nan apesar cu fraccion di MEP, fraccion di PDR y un miembro independiente a presenta 16 mocion pa wordo tuma na consideracion, na final di tratamento di e presupuesto nan a bira vota “contra” di presupuesto 2017, confirmando loke Nel Oduber a bisa den pasado.

Hasta e propio yiu homber di Nel ta haci manera su tata a mustra esta di gaña muri pa mira cuanto hende ta bin yora na su entiero ya cu ta imposibel cu nan no ta sostene e presupuesto 2017 pero sin ta dicidi di presenta 16 mocion cu ta relaciona directamente cu mesun presupuesto aki.

Oposicion ta hopi bruha y e sistema cu nan a dicidi di no sostene presupuesto 2017 ta mustra hopi di nan incapacidad politico tambe y un falta di seriedad total pa cu nos pueblo, ya cu en total  32 mocion a ricibi sosten total di Parlamento, incluso nan a sostene mocionnan di fraccion di AVP,” Parlamentario Melvin Tromp ta mustra.

 

- Advertisement -

DUNA COMENTARIO

Please enter your comment!
Please enter your name here