Home General Proyecto nobo di ‘Flywheel’ ta operacional final di 2017

Proyecto nobo di ‘Flywheel’ ta operacional final di 2017

3
0
SHARE
- Advertisement -

Turbina den operacion uzando gas produci pa sushi di cas

ORANJESTAD (AAN): Cada dia Aruba ta logra un avance den e meta poni pa ta 100% liber di ‘Heavy Fuel Oil’ den produccion energetico di nos pais. Diabierna ultimo a tuma otro stap pa ta mas independiente riba e tereno aki, na momento di groundbreaking di proyecto di un ’Flywheel’ park. ‘Flywheel’ ta un sistema di almacenage di energia, cu ta haci e maneho di e diferente fuentenan energetico mas efectivo y eficiente. Pero na mesun momento Luis Oduber, director di WEB Aruba NV a anuncia un otro logro den e produccion y suministro di awa y coriente.

   Oduber a haci anuncio di resultado di un proyecto cu nan a bin ta trahando riba dje e ultimo aña. Ta trata aki di e proyecto di conversion di ‘biogas’ pa energia, pa por suministra coriente. El a felicita e team di WEB Aruba NV, kendenan diahuebs anochi a pone e turbina cu ta draai riba gas, ‘online’. Special den esaki ta cu e fuente di energia, e gas, cu ta worde uza pa opera e turbina a worde produci na Aruba mes.

E ta worde produci for di sushi di cas cu ta worde procesa den un planta na Aruba mes. E testnan necesario a mira cu e ta opera manera mester, uzando gas, tabata un exito. E tecnico di Caterpillar a splica cu asina cu a primi e boton, e turbina a cuminsa funciona manera cu a spera, loke ta un motibo pa felicita e team di WEB Aruba NV cu a traha riba e proyecto aki.

Director di WEB den su discurso a bisa cu e ‘Flywheel’ ta conforme parti di e plataforma di WEB su Plan Strategico pa Energia Renobabel. E ta cuadra tambe den e strategia di Gobierno pa logra un red stabil y un penetracion mas grandi di energia renobabel. “Awor nos ta demostrando mundo cu, apesar cu nos ta chikito, ta posibel pa logra e meta ambicioso pa na 2020 ta 100% sostenibel. Pa un isla manera Aruba, e ta un reto grandi, mirando cu ta un planta pa produccion di awa y coriente tin. Pues no tin ningun backup.”

Oduber a splica cu e sistema moderno di almacenage ta bay ta diferente cu sistemanan convencional. E ‘flywheelnan’ ta di un tecnologia hopi avansa y pa su mayoria ta bay worde instala den un structura bou di tera, un tipo di fundeshi di beton.

E energia extra durante produccion di e varios fuentenan cu WEB Aruba NV ta maneha ta worde manda pa e Flywheel y esaki lo worde uza ora cu e demanda pa coriente ta halto of e produccion ta baha. E 5 MW cu e sistema aki por almacena durante 13 minuut ta suficiente pa operadornan di WEB, por ahusta nan sistema na WEB pa por percura pa stabilisacion di e red di coriente riba nos isla. E ta manera un ‘shock absorber’, Oduber a splica.

Despues di construccion di e fundeshi, ta bini e parti di instalacion di e flywheelnan di e compania Canades Temporal Power Ltd. Pa, aproximadamente, otro aña april e prome flywheelnan lo yega Aruba. E di tres fase ta instalacion di e flywheelnan den piso y finalmente integra nan riba e grid di ELMAR. Pa final di 2017 e mester ta completamente operacional, e director a splica.

- Advertisement -

DUNA COMENTARIO

Please enter your comment!
Please enter your name here