Home Hudicial Sospechoso asaltante Venezolano haya cu arma di candela y granada di man

Sospechoso asaltante Venezolano haya cu arma di candela y granada di man

15
0
SHARE
- Advertisement -

E ta forma parti di un grupo

granada_man__ORANJESTAD (AAN): Manera DIARIO a publica, Ministerio Publico ta persigui un grupo di Venezolano cu a haci serie di atraco arma. Ta asina cu di e 4 sospechosonan, solamente dos nan caso a worde trata mientras e otro dos, ariba peticion di nan abogado, e caso a keda posponi.

    SOSPECHOSONAN GEBOEI:

   E sospechosonan L.S.R., N.V.J., E.W.L. y J.d l C. a presenta den sala di Corte cu nan mannan y pianan geboei. Esaki ta indicacion cu ta considera nan personanan peligroso pa huy. Ora nan tabata den sala di Corte, e miembronan di CEA a kita e boeinan di man pero esnan di pia a keda. Ora Fiscal a lesa e acusacionnan, por a compronde pakico ta considera e grupo aki peligroso.

   ASALTONAN ARMA:

   Fiscal a bisa cu e acusacion ta varia pa algun pero e mayoria lo ta envolvi den varios di e asaltonan arma.

   Fiscal a menciona cu dia 24 di Maart 2016 algun di e grupo a haci un asalto arma na un oficina di number na Piedra Plat. Ta sera papia di dos asaltante cu tabata arma kendenan a bay cu placa for di e oficina y tambe prendanan di e personan cu tabata den e oficina di number.

Fiscal a sigui bisa cu dia 27 di Maart 2016 nan a haci un asalto arma riba un mini market den Caya Betico Croes. Aki tambe ta papia di dos asaltante.

Fiscal a sigui cu dia 17 April 2016 tres asaltante a haci un asalto arma den un cas di muhernan di bida den Koningstraat.

    SOSPECHOSO CU ARMA Y GRANADA:

    Normal sa scucha cu asaltantenan tabatin sea arma di candela of cuchiu. E biaha aki e asunto a bira mucho mas serio. Fiscal a menciona cu e sospechoso L.S.R. ta worde acusa di posecin di arma di candela y bala entre Maart 2016 y April 2016. Tambe Fiscal a menciona cu Polis a haya L.S.R. cu un granada di man. Esaki ta un arma sumamente peligroso cu por kita bida di un cantidad di hende.

Kico realmente ta e motibo cu e sospechoso tabatin un granada di man, no ta mucho cla. Posiblemente durante tratamento di e caso esaki lo bin dilanti.

    POSPONE CASO CONTRA DOS SOSPECHOSO:

    Despues cu Fiscal a lesa e acusacionnan, abogado mr. Illes, cu ta representa e sospechoso L.S.R., a pidi Hues pa pospone e caso pasobra el a tuma over e caso di un otro abogado pero e no a haya tempo pa studia e cantidad di documentonan. Fiscal a propone pa dia 7 December pa 8.30 di mainta. Hues a bay di acuerdo cu esaki ya cu e dia ey e mes tin cu trata e schedule di casonan penal.

   Despues abogado mr. v.d.Biezen tambe a pidi Hues pa pospone e caso di su cliente E.W.L. E abogado a bisa Hues cu e motibo cu e ta pidi pa pospone e caso, ta pasobra e ta haya cu falta investigacion cu e ta desea pa sosode.

   E abogado a remarca cu e no a haya procesverbaal di cellularnan cu a confisca. Ta papia cu lo haci investigacion riba e cellularnan pero a no a haya nada di esaki. Tambe e abogado a bisa cu e kier scucha tres testigo. Mr. v.d. Biezen a bisa Hues cu e kier cuestiona reconocemento riba potret di e asalto na Piedra Plat. E reconocemento a sosode 3 luna despues di e asalto. Pesey e kier scucha e testigo cu a reconoce E.W.L. Tambe e asalto na e mini market den Caya Betico Croes y e asalto na Macuarima, e kier scucha testigo. Tur tres caso ta bay riba reconocemento di potret.

   Fiscal a bisa cu e ta lamenta cu awor numa e abogado ta pidi pa scucha testigonan. El a bisa cu e procesverbaal a keda cla laat tambe. E ta haya cu ta puntonan importante como prueba esnan cu a reconoce e potretnan. El a bisa cu duna descripcion no ta mesun cos cu reconoce potret. E no tin nada contra esey. Tambe lo bay laga traha procesverbaal di e cellularnan cu a investigacion.

Fiscal a propone Maart 2017. Abogado mr. v.d. Biezen a puntra Hues pakico no ta trata e caso hunto cu esun di E.W.L. Hues a mustra cu tin mas casonan caba riba e dia ey.

E sospechoso mes tabata manera desespera. El a bisa Hues cu e kier keda cla cu e cos aki. Hues a bisa of ta sigui cu e caso of lo mester pospone e caso pa otro aña. El a bisa cu e kier warda pa otro aña.

Hues a bisa cu den e caso L.S.R., por ta abogado mr. Illes lo kier haci cierto investigacionnan y si esey ta e caso, por spera cu ta otro aña e caso lo worde trata.

- Advertisement -

DUNA COMENTARIO

Please enter your comment!
Please enter your name here