Home General Tene cuidao cu grupo falso buscando donacion pa damnificadonan na Aruba

Tene cuidao cu grupo falso buscando donacion pa damnificadonan na Aruba

5
0
SHARE
- Advertisement -

No cay den nan trampa!

ORANJESTAD (AAN): Un alerta urgente ta bay na pueblo, pa tene cuidao!  Watchout cu hendenan cu lo ta pasa gaña busca donacion e dianan aki, y ta gañabo cu loke nan ta haciendo ta pa yuda e decenas di ciudadanonan cu a wordo perhudica gravemente debi na e inundacion di Diadomingo mainta riba Aruba.

   Specialmente riba Social Media, bo ta haya hende cu no tin nada di haber cu “yudanza na damnificadonan”, y cu ta pone peticion pa pidi yudanza di publico, y ta usa potret di casnan di hende, siendo cu e habitantenan no sa mes kende nan ta.

   DIARIO a haya sa, cu specialmente riba e plataforma di Facebook cu e pagina di “Vraag&Aanbod Aruba”, tabatin pa algun dia caba un grupo cu ta yama nan mes “Bende Yuda Duna” cu tabata cuminza pidi yudanza.

   Sinembargo ora cu ciudadanonan a cuminza cuestiona e legitimidad di e grupo ey… mesora nan a core cera nan account, y pa su siguiente dia a habri un otro, y a dune e number “Donacion Pa Humanidad Aruba”, y a cuminza haci e mesun cos.  Ora cu famianan di e victimanan real a cuminza cuestiona esaki, nan a bolbe spanta y cera e account.

   Esaki ya caba ta indicacion grandi, cu e grupo aki ta djis ocupa cu actonan fraudulento, gañando hende pa haci donacion, sin cu nan mes ta duna nan propio nomber, ni nan adres.

   Nan ta bisa cu nan mes ta bin busca bo material pa donacion, pasobra claramente nan no kier divulga nan propio adres.

   DIARIO ta manda un advertencia serio na pueblo pa tene cuidao cu e malandronan aki cu ta malusa e dificultad di algun hende debi na inundacion, djis pa kizas nan mes haya donacion y keda cu nan.

   NOTA DI REDACCION:  E malandronan a usa un nomber similar na un grupo legitimo cu si ta trahando bon y di acuerdo cu necesidadnan di hendenan.  DIARIO ta indica cu e grupo “Cu Curason pa Humanidad Aruba” si ta uno corecto.  Sumamente di malafe cu e otro hendenan a usa un nomber similar, djis pa despista hende.

- Advertisement -

DUNA COMENTARIO

Please enter your comment!
Please enter your name here