ORANJESTAD (AAN): Uso di droga ta keda un problema serio ta hopi famia ta pasando duro cu yiu adicto. Esnan cu ta bende si no ta suministra na yiunan droga. Patruya Noord a wordo dirigi riba instruccion di central di polis, na Boegoeroei, pa nan atende e mucha homber conocido di polis cu lo a maltrata su mama.
E yiu homber lo ta di remate. Patruya a trot pa yega mas rapido posible na e direccion y na yegada polis a topa e famia den cura. Ta trata di e tata, mama mas dos yiu homber. Parce e yiu homber mas grandi inicial T. ta biba na skina y e lo a bin yuda su mama ora cu e ruman mas hoben a ataca e mama fisicamente.
E mama inicial H. kier entrega keho di maltrato contra e yiu homber. Ademas e ruman mas grandi a bisa polis cu e ruman a atake fisicamente cu consecuencia su bril a kibra pa cual e tambe kier entrega keho tocante esaki.
Polis a avisa tanto e yiu homber mas grandi y e mama pasa pa entrega keho na recherche. Relaciona cu locual a tuma lugar polis a detene e mucha homber E.T. Alavez e mama a bisa polis cu e yiu homber mas hoben en cuestion ta usa droga y pafo riba mesa cura probablemente lo tin substancia (droga).
Patruya a wordo pidi pa bay hunto pa wak y riba e mesa pariba di cas enberdad a wordo descubri poco substancia parecido na Cocaina na bloki chikito.
Un total di 7 bloki chikito den un saco transparente a wordo confisca. Y tambe tin riba e mesa saco chikito transparente pero bashi cual a lanta sospechoso cu E.T. lo a dal su cos caba abase di su comportacion.
Polis a confisca evidencianan y lo wordo entrega na departamento anti droga cu lo continua cu lo demas investigacion.
