Home Politica Clarisca y henter partido di AVP mester stop di manipula y tira...

Clarisca y henter partido di AVP mester stop di manipula y tira klinker den wowo di nos conciudadanonan

3
0
SHARE
- Advertisement -

Francis Jacobs di MEP:

ORANJESTAD   (AAN):    Segun Francis Jacobs di MEP, recientemente Clarisca Velasquez a saca un comunicado tratando di manipula mente di e comunidad di Aruba, cu segun investigacion di diferente universidad rond mundo, cu nos hendenan di Aruba a sali number 1 como e hendenan mas feliz di mundo y cu tur nos hendenan ta biba dushi.

Clarisca ta biba riba luna

Clarisca mester cuminsa biba cu e realidad cu na Aruba tin pobresa cu a aumenta drasticamente durante e ultimo añanan di e gobernacion putri di AVP of acaso e ta bibando ariba luna?

Na Aruba tin hende, famianan cu ta sin trabao, esnan cu ta sin coriente y sin awa y otronan sin un dak riba nan cabes y abo ta kere cu bo por bay personalmente y bisa e hendenan aki cu Aruba tur su hendenan ta feliz y ta biba dushi?

Bo kier ami mes hiba bo cerca e hendenan aki pa bo mes bisa nan? Mi recomendacion na abo ta pa pidi bo Lider yoron pa e bay bishita e hendenan aki y duna nan ayudo cu nan mester y cu nan merece.

Un otro bon recomendacion Clarisca, cuminsa mustra cu berdaderamente abo ta un parlamentario, ta un berdadero sirbidor di pueblo y cuminsa traha pa e pueblo manera Bo responsabilidad ta exigi di bo.

Pogreso y desaroyo of mas debe pa e puerblo paga?

Clarisca ta anuncia cu ta danki na su Gobierno cu ta cumpliendo cu nos hendenan, nan ta biba dushi.

Digno conciudadano, awor ta keda na abo cu ora topa Clarisca ariba caya bis’e con dushi e debe cu e y su Gobierno a hinca nos aden, con caro nos Aruba a bira, con dificil ta pa biba na Aruba cu e gastonan impagabel y ultimo bis’e/reclam’e cu e y su Gobierno a hinca nos den un mega debe cu nos, nos yiunan y nos nietonan y nan yiunan cu no a ni a nace ainda tin di paga.

Clarisca, ami no ta kere cu abo lo sintibo trankilo ta canando riba caya sin cu e pueblo reclama bo, pasobra pueblo ta bay reclama bo y cu tur nan rason. Pueblo haci uzo di bo derecho!

Nos economia a crece?

Clarisca, abo y e resto di 12 parlamentarionan incluyendo e Ministernan di AVP, boso tur ta culpabel, pasobra boso tur a acepta y vota voor pa laga e Gobierno sigui hinca nos den e debe astronomico. Na e momentonan aki, Dios spaar nos pasobra si bin un calamidad na Aruba, Aruba no tin placa di reserva pa salba nos. Clarisca, bo a declara cu e siguiente eleccion abo no ta bay t’ey mas ariba lista di e partido di mas putri cu nos conoce den historia di Aruba su politica, pesey keda keto pasobra mas bo papia y mas bo skirbi, mas rabia e pueblo di Aruba ta haya ariba bo Gobierno di AVP cu boso mentalidad putri y diabolico.

Mihor Clarisca splica pueblo

*Dicon abo a acepta pa no elimina 3 % di BBO cu abo y AVP a priminti di lo elimina (wak e video di 2009 ariba youtube), dicon a aumenta BBO cu Health Tax na 3.5% cu ta e aumento di BBO?

*Dicon criminalidad a aumenta y dicon abo ta critica e polisnan hoben mientras ta bo Gobierno y Minister di Husticia no ta sirbi?

*Dicon nos debe nacional a aumenta sin conta e proyectonan PPP cu ainda falta?

*Dicon y con bo a haya e permiso pa bay studia 2 aña mientras bo a laga bo responsabilidad como sirbidor di pueblo un banda?

*Dicon abo a acepta CAFT bin kita nos autonomia? No t’abo tambe a vota voor?

*Clarisca tur loke nos pueblo ta pasando aden, abo ta mes of mas culpabel.

 

Esaki ta djis algun ehempel di tur e malicianan cu boso di AVP a haci contra nos pueblo cu e biaha aki lo no cay mas den boso manipulacion y mentiranan. Mihor boso baha pa caba y laga otro partido cu si tin e pueblo aki na pecho dirigi destino di e pais aki.

 

 

 

 

- Advertisement -

DUNA COMENTARIO

Please enter your comment!
Please enter your name here