Home Editorial EDITORIAL: Aruba ta exigi seguridad y orden

EDITORIAL: Aruba ta exigi seguridad y orden

893
0
SHARE
- Advertisement -

Ultimo dianan ta ripara cuanto violencia sin sentido ta tuma lugar.  Un anciana di casi 100 aña a bira victima di asalto den su cas, un famia naTanki Leendert a bira victima di asalto den cas, y awe por lesa di un famia na Washington cu tambe ta victima di asalto y violencia sin sentido.

E cos aki ta ponebo pensa tocante: Kico tin cu haci cu esnan responsabel ora pone man riba nan?

Ki mensahe nos por manda y ki accion por tuma pa e barbaridad nan aki no sosode mas riba nos isla?

Ta tende e pregunta expresa: “Ta kico polis y recherche ta haci ?” No ta esey mester puntra !

Mester puntra te na cua punto atraco nan mester yega pa gobierno dicidi di sinta cu Ministro di Husticia y Cuerpo Policial pa mira kico mester haci pa pone un fin na e manera cu e criminalnan aki ta destruyendo Aruba su seguridad, economia y paz por completo.

Mester puntra ta cuanto equipo nobo cuerpo policial a pidi pa por eherce nan funcion mihor cu no a ser otorga?

Mester puntra si polis tin e fondonan necesario pa por  brinda nos seguridad of si e fondonan aki a ser nenga pasobra no tin placa?

Tin varios pregunta cu mester wordo contesta prome cu nos por mik dede riba es(nan) di berdad culpable.

Pa decadanan largo, cuerpo policial a combati den un forma hopi eficiente e delincuencia na Aruba. Nan a planta respet na e maneranan cu nan tabata actua, persegui y aresta e malechornan. No tabatin caminda pa sconde.

Poco poco esaki ta cambiando. No pa falta di Cuerpo Policial, sino pa e manera cu Gobierno a faya den facilita e recursonan pa nos cuerpo di polis adapta na tur e cambionan cu ta tumando lugar na Aruba.

Poblacion ta creciendo cada aña den cifranan record. Cu esaki mester di mas scol, cuido medico, hospital mester di mas dokter, mas camber entre otro, ademas mester di mas espacio comercial pa adapta na e demanda. Mas auto, mini market, pa menciona  algun necesidad adicional.

Ta di compronde cu Cuerpo Policial no por keda stanca mientras e demanda ta exigi mas polis, ekipo, training, tecnologia mas avanza, como prioridad.

Ban no lubida, cu pa tur loke ta pasando den nosvecindario, ainda nos ta drumi dushi anochi. Nos curanan no mester ta halto, y definitivamente no mester tin glas kibra pega na e parti ariba di muraya pa ningun hende no bula.

Heki ta decorativo  mas cu pa seguridad. No mester tin 20 lock na bo porta prome cu bo logra habri’e.  Autonan mester djis di yabi, no di cantidad di alarma y cu necesidad di kita bateria tur anochi por si acaso.

Ainda nos por sali cana anochi sin absolutamente ningun preocupacion, sinta den un teraza of na beach anochi pa disfruta di nos naturaleza. En fin, por sigui duna ehemplo sin fin di con dushi bida ta ainda pa nos aki na Aruba.

Tur esaki ta unicamente danki na nos Cuerpo Policial. Na ningun otro instancia.

Gobierno mester corda cu si cos sigui escala y polis no haya un man pa loke nan mester pa resolve e asunto tristo aki, e punto lo yega cu e frecuencia di crimen lo sali for di man.

Pa decadanan polis  a combati y elimina  criminalidad. Pueblo tin miedo di mira esaki cambia na e punto cu lo no ta posible mas. Cu polis su man nan lo ta yen y  cu gobierno no habri wowo na tempo

Cu e temporada di eleccion, hopi ta preocupa cu politiconan lo ta mas atento pa mantene votonan cu pa atende asuntonan di  alta importancia manera loke ta pasando cu e seguridad di nos isla.

Gobierno mester percura di inmediato pa Cuerpo policial haya tur locual e mester pa por traha mas eficaz y eficiente.

Aruba ta exigi seguridad y orden

 

 

 

- Advertisement -

DUNA COMENTARIO

Please enter your comment!
Please enter your name here