Tanten awa ta sigui yobe por sigui spera mas buraco den caminda

Publication: Wednesday, 11 January 2017. Categoria: General

ORANJESTAD (AAN): Chofernan ta mira nan ta aparece tur caminda!

E motibo pakico tin asina tanto buraco riba camindanan a causa di yobidanan, ta pasobra cu hopi caretera ta na turno pa haya mantencion necesario.

Door cu e yobidanan tabata asina hopi, e daño a bira asina grandi, Marlon Jacobs, hefe di seccion Infrastructura y Trafico di DOW a splica.

Den un declaracion duna, e funcionario a splica cu mientras cu awa no stop di yobe, e buraconan lo sigui worde crea. Ta algo cu a yega di sosode den pasado caba ora cu awa a yobe den forma pisa y pa periodonan largo. Mas ainda riba careteranan cu ta na turno pa un mantencion grandi.

Den fin di siman cu ta tras di lomba mes personal di DOW a haci un sondeo y a constata cu e problemanan mas grandi ta riba e camindanan di mas o menos 20 aña of mas di existencia. Un caminda nobo normalmente tin un bida di 40 aña maximo, dependiendo di factornan manera con hopi e ta worde uza, e efecto di solo y yobida.

Pa añanan largo camindanan ta worde renoba y Jacobs ta calcula cu esaki ta rond di 180 pa 200 km pa aña, cual na su turno ta un inversion grandi, ademas cu e cantidad grandi di trabao aki no por keda realisa den un periodo cortico. Por ehempel, renobacion di un caminda mes ta costa rond di 1100 Florin pa meter, cu normalmente tin un hanchura di 6 meter. Pesey semper ta haci un evaluacion si por scapa un caminda prome cu tuma un decision pa reconstrui esaki.

Den e situacion actual, desde cu departamentonan di Gobierno a reanuda nan trabao na inicio di 2017, a pone tur e ploeg disponibel pa e 4 vehiculonan cu DOW tin pa carga asfalt cu ta worde uza pa tapa e buraconan durante e temporada di yobida. Nan ta pasando rond Aruba y lo sigui haci esaki mientras cu tin buraco pa tapa. Mientrastanto, DOW ta trahando pa lanta un team di evaluacion pa e trabao cu mester worde haci riba e careteranan existente, Jacobs a comenta.

Leave a Reply