Venezuela lo ta marchando en grande dia 23 di Januari

Publication: Wednesday, 11 January 2017. Categoria: General

Ta pidi tur instancia internacional manda observador

ORANJESTAD (AAN): Manera ta conoci, recien Asamblea Nacional na Venezuela a bay di acuerdo y tuma decision cu President Nicolas Maduro a abandona e cargo y laga e pais den crisis y problema.

Awor Dr. Enrique Aristeguieta Gramcko, Presidente di Venezuela Soberana, a felicita Asamblea Nacional pa e decision historico aki, cu lo bay permiti Venezuela libera definitivamente di e dominio Cubano.

Dr. Aristeguieta ta kere cu ora ni Nicolas Maduro, ni e institucionnan secuestra pa Chavismo kier cumpli cu e mandato di Asamblea Nacional, tin di bay obliga nan!  Pesey e ta propone pa dia 23 di Januari awor (fecha cu ta conmemora e caida di dictadura di Pérez Jiménez, pueblo lo marcha pacificamente rumbo Palacio di Miraflores pa exigi Maduro pa e bay.

“E marcha mester wordo encabeza pa e 112 diputadonan di oposicion, acompaña pa tur dirigente di MUD, e gobernador- y alcaldenan opositor, y e lidernan di e organizacionnan di gremio, sindicato, studiante, NGO’s, y di universidadnan y academianan, como tambe militarnan retira.  Pa mi lo ta un honor y privilegio di bay ta den prome rij,” Dr. Aristeguieta a bisa.  E ta unico sobreviviente di e Hunta Patriotico cu a deroca Pérez Jiménez.

E president di Venezuela Soberana a propone pa evita un masacre manera a socede na Puente Llaguno, e ta haya cu mester solicita comunidad internacional via di e embahadanan na Caracas, na Vaticano, na organizacion OEA, y na Nacionnan Uni, Union Europeo, y Corte Penal Internacional, y prensa internacional, pa manda observador pa nan ta presente e dia ey.  Tambe tin di exigi Forzanan Arma pa neutraliza e bandidonan cu ta core rond arma.

Aristeguieta Gramcko a finaliza bisando: “Ya caba Asamblea a cumpli, destituyendo Nicolas Maduro formalmente di su cargo.  Awor ta toca na pueblo Venezolano, acompaña pa Forzanan Arma pa haci validez na e decision di Asamblea Nacional.  Ban ripiti e hazaña di 23 Januari 1958, y lo bin un un Gobierno di transicion y lo convoca eleccion general.

Leave a Reply