Aruba tambe mester di un ley di recuperacion di crisis economico

Publication: Friday, 17 February 2017. Categoria: Politica

Segun parlamentario mr. Andin Bikker:

ORANJESTAD (AAN) – Den conferencia di prensa di Partido POR, mr. Andin Bikker a expresa cu e economia di nos pais ta tranca y mester worde reactiva.

E parlamentario a comenta cu hopi hende ta reclama cu nan no por haya trabao den sector comercial y esaki ta sosode debi cu nos economia ta stagna.

E organizacion POR ta un plataforma cu semper banda di señala problema ta busca solucion, y den e caso aki un solucion por ta haci algo similar na Hulanda.

Na Hulanda na 2011 nan a pasa un ley di crisis di recuperacion. Bikker a splica cu aya nan a haci un inventarizacion y nan a ripara cu diferente aspecto cu ta stimula e economia ta tranca pa motibo cu e vergunningnan ta stanca y ta den proceso.

Na Aruba Bikker a bin compronde despues di a reuni cu diferente instancia, cu tin un average di como 500 vergunning den construccion cu ta den proceso y ta wardando pa un verkavelings plan cu ta tarda entre un y dos aña.

Andin Bikker a menciona cu ora tin retraso di un of centenares di bowvergunning e banconan no ta duna hipoteca, notarionan, e companianan di construccion, e empresanan cu ta bende material pa construccion no ta traha, y ta surgi un serie di aspecto cu economicamente ta tranca pa procesonan di vergunning asina largo.

El a agrega cu gobierno su tarea ta agiliza e proceso economico. Na final di dia gobierno tin cu stimula e economia via vergunningnan y e sector economico tin cu percura pa e resto. “Pero si gobierno ta tarda den e procesamento di e permisonan aki mester para keto pasobra varios instancia ta pensa cu esey no ta manera.

Na Hulanda aworaki, despues cu nan a introduci e ley, si wak e programa di tur e partidonan cu ta bay eleccion na e momentonan aki, nan tin surplus riba nan presupuesto. Despues cu nan a bay riba e proceso akinan placa ta restando”, segun Andin Bikker.

Na su opinion, ta relativamente facil pa agiliza e proceso menciona, ora un persona tin derecho riba dje pa e bin na remarca na un periodo relativamente corto pa e economia por sigui move.

“ Esaki ta traha caba den un concepto di iniciativa pero manera cu POR drenta den gobierno sigur lo ta algo cu nos lo por bay brinda nos pueblo”.

Tambe e parlamentario a comenta cu hopi partido na momento di bay eleccion ta priminti hopi.  Un ehemplo ta AVP na 2001 cu a priminti kita BBO y aworaki a introduci  BAZV cu ta 3.5 porciento.

“Ora POR drenta gobernacion despues di cien dia mester bisa ki a logra, despues di un aña mester bisa ki a logra y asina cada bez”.

Tin varios proyecto di ley pendiente, entre otro E Academia di ley cu nan kier bin cune pa moderniza nos leynan.

“Y pueblo por wak despues di cien dia, seis luna, un aña den gobernacion cu pueblo por wak constantemente kico Bikker, Oduber, Croes, a logra. Asina pueblo por wak cu nan a duna nos nan voto di confianza y cu nos ta cumpli cu pueblo”, Andin Bikker a conclui.

 

 

Leave a Reply