Minister Hooyboer a firma acuerdo cu Niagara College

Publication: Friday, 17 February 2017. Categoria: General

ORANJESTAD (AAN): E siman aki Minister di Enseñansa, Michelle Hooyboer-Winklaar a anuncia cu su Ministerio a logra e di 8 acuerdo cu un school di estudio superior, (4 na Merca y 4 na Canada), esta Niagara College.

“Nos tin un anuncio hopi importante pa un otro acuerdo riba enseñansa superior. Loke cu nos ta yamando awor e di ocho acuerdo similar cu ta duna nos studiantenan diferente beneficionan, entre otro, e parti financiero pero tambe otro oportunidadnan cu nos ta brinda nos studiantenan. Den e caso aki specificamente pa studia na Canada,” asina e mandatario a cuminsa su relato.

El a sigui bisando cu hopi orguyo e ta para na e momento unda lo firma un acuerdo cu Niagara College di Canada cu ta duna acceso na studiantenan. “Tur esaki a base di nos meta pa habri mas oportunidad posibel pa nos studiantenan a pesar di unda nan lo kier studia y den cualkier ramo cu nan kier studia. Asina aki nos ta kita kisas obstaculonan cu den pasado tabata existi. Entre otro, riba parti financiero pero tambe simplemente informacion hopi biaha cu tabata falta pa studiantenan tuma decision a base di kico nan kier studia y na unda nan kier studia”, di acuerdo cu e mandatario.

“Nos ta gradici Embahada di Canada na Caracas, Venezuela cu a haci esaki posibel como tambe e diferente deliberacionnan cu instancianan y cu otro schoolnan cu a yuda nos yega na nos acuerdonan. Nos ta hopi entusiasma pa por brinda e oportunidad aki na studiantenan cu ta interesa den e opcion aki”, Minister Hooyboer-Winklaar a remarca.

Minister Michelle Hooyboer-Winklaar a gradici e Embahada Canades y representante di Niagara College pa nan rol na yega na e acuerdo importante aki na beneficio di studiantenan di Aruba.

 

Leave a Reply