Otmar Oduber hopi contento cu e desaroyonan positivo di nos turismo!

Publication: Friday, 17 February 2017. Categoria: Politica

Felicitando ATA y su partnernan:

ORANJESTAD (AAN) – Diahuebs mainta a tuma lugar e conferencia di prensa di partido POR, den e sede situa na Cayena Mall.

Otmar Oduber, lider di e partido, a cuminza pa referi na e tema di criminalidad riba nos Isla, y tambe aspectonan positivo cu cifranan di turismo ta indica.

Cifranan preliminar cu a sali pa loke ta trata e pilar economico di nos pais cu ta nos turismo, locual a worde premira for di aña pasa caba, ta mustra cu aña 2017 ta un aña fuerte.

“No solamente e bishitantenan cu ta bin atravez di nos aeropuerto pero sigur tambe e pasahero crusero cu e aña aki e cifranan cu ta worde calcula ta mustra cu lo kibra record hasta di aña 2013 cu tabata esun di mas halto den historia di pasahero crusero, cu 750 mil bishitante cu lo ta yegando nos Isla e aña aki”, Otmar Oduber a señala.

El a agrega cu riba su mes el a pone un enfoke hopi grandi e tempo ey y esey ta bon pa nos pais su economia tambe, mirando cu keto bay e dependencia ta hopi grandi riba nos turismo, y pesey mes e plataforma tin proposicionnan definitivo y duradero pa por diversifica e economia di Aruba.

“Sinembargo ainda, keto bay, mirando cu nos refineria ainda no ta duna señal di bida ta keda e pilar economico di nos pais, y pesey awe ta bon pa un biaha mas nos por duna e noticianan positivo aki, pa loke ta trata cifranan di nos turismo”, Otmar Oduber a subraya.

Encuanto nos bishitantenan cu ta yega via aerea, tambe e ex-minister ta sumamente satisfecho di mira cu e trayectoria cu a worde hiba pa loke ta regarda e grado di ocupacion cu a habri na Januari hopi fuerte. Un grado di ocupacion di casi seis porciento na hotelnan.

Esaki ta hopi importante pasobra apesar cu for di cuminzamento di aña pasa tabata conoci cu e fenomeno di e venezolanonan su efecto ta bay termina na Mei di e aña aki, mirando cu aña pasa e gobierno Venezolano a tuma e medidanan necesario encuanto e venezolanonan cu tabata bin pa cambia Dollar, cu tabata keda den apartamentonan, y cu tambe a trece un economia adicional e tempo ey, ta termina na Mei venidero.

Otmar Oduber a señala cu esey lo trece un normalizacion den e mercado venezolano, y sinembargo cu nos ta perde asina tanto di nan por mira tog cu nos hotelnan unda nos hendenan ta traha y tin gran parti di e empleonan, cu ta forma e totalidad di casi 90 porciento di nos forza laboral, e aña aki ta cuminza hopi fuerte.

E mercado Mericano ta fuerte, el a agrega. Aeropuerto tambe ta mustra cu e mercado aki ta sigui crece, y nan a haci un esfuerzo hopi grandi pa locual Otmar Oduber ta felicita tur instancia: ATA, AHATA, APA y otronan cu a percura pa un crecemento den e prome cuartal di e aña aki, den cantidad di e cantidad di avionnan cu ta haci di e demanda uno mas complaciente pa Aruba. “Danki Dios no ta mira cu esey a funciona pa e prome lunan di e aña sumamente positivo, y naturalmente nos ta spera cu esaki por continua durante e lunanan venidero y cu ATA por sigui haci e trabao sumamente positivo conhuntamente cu e partnernan manera AHATA, Triple A y APA pa loke ta trata nos turismo”, Otmar Oduber a expresa.

 

Leave a Reply