Alarma falso di bom na Holliday Inn diasabra atardi

Publication: Monday, 20 March 2017. Categoria: Policial

ORANJESTAD(AAN): — Na Holliday Inn mester a evacua tur hende diasabra atardi, despues cu banda di 2or atardi di e Dia Nacional e melding a drenta na e hotel mes. E informacion tabata cu tin un bom den e lobby.

Mesora a evacua tur hende den e lobby pa asina mantene e area cu e seguridad necesario. Polisnan a wordo yama y a presenta na e sitio.

E expertonan di bom di cuerpo policial tambe a wordo yama. E buskeda a cuminsa mesora y despues di casi dos ora di buskeda a constata cu ta un alarma falso.

No a topa ningun obheto of algo cu tabata indica algo  di un bom. Ta kere cu un persona disgusta cu kizas trabou na e hotel ta esun cu a haci e yamada y causa panico innecesario.

E momento ey tabata momentonan tambe di check in y check out. Pa e turistanan e tabata basta desagradable.

E turistanan cu tabata yega hotel no por a baha y tabata puntra taxistanan kico tabata pasando. Finalmente tur cos a caba sin incidente pero autoridad tin atencion pa e caso y ta tras di esun cu a yama Holliday Inn pa bati alarma falso. Castigo severo ta na su lugar ora pone man riba esnan cu ta comete e actonan aki.

 

Leave a Reply