ORANJESTAD,(AAN); — A drenta diaranzon mainta informacion di un persona cu a reporta na Central di polis, cu na altura di La Fama el a topa un señora di edad ta yorando.
Esun cu a reporta a sigui declara cu e señora a declara na dje cu el a wordo atraca pa algun sospechoso cu tabata den un auto color shinishi marca Toyota Tercel.
Centralista a puntra e persona cu a reporta kico ta mas o menos e suma cu e señora tabata tin cune, y e ta declara cu e sospechosonan probablemente a bay cu 1500 florin.
E persona cu a reporta a bisa e centralista cu e ta bay cu e señora na Lands laboratorium pa spera riba yegada di e patruya. Tanto personal di recherche y Slachtofferhulp a wordo poni na altura relaciona cu e atraco.
Patruya Oranjestad a transporta e victima pa despacho di recherche situa den Frankrijkstraat.
Mientras personal di ambulans tambe a wordo dirigi na Frankrijkstraat pa controla e victima debi cu e ta pashente di curazon.
Ta di spera cu autoridad lo logra pone man riba e malhechornan aki. E spanto cu e victima a pasa aden por (a) causa daño grandi na su salud.
