Home General PAHO y WHO a confirma cu awa di Aruba ta entre e...

PAHO y WHO a confirma cu awa di Aruba ta entre e mihonan di mundo

1
0
SHARE
- Advertisement -

ORANJESTAD (AAN): E reunion cu e instancianan di salud y organizacionnan, cu tin di haber cu maneho y procesamento di awa, tabata un iniciativa di Minister di Salud Publico, Dr. Alex Schwengle.

Durante di e reunion aki a sali na cla cu tin cu continua cu e strategianan di maneho pa cu awa pa bebe (sin riesgo pa consumo humano), sigui evalua e situacion di dam, tanki y posnan cu ta uza awa pa irigacion (agricultura y lansdscaping) y tambe awa procesa (p.e. di beerput).

Ta importante pa sigui e guianan internacional manera di WHO/PAHO y haci uzo di e normanan, monitor y vigilancia pa mantene bon calidad di awa, tanto pa salud di hende, mata, animal y pa medio ambiente en general. Asina dr. Wilmer Salazar di Departamento di Salud Publico Aruba (DVG) a splica.

“E reunion no tabata solamente pa Departamento di Salud  Publico, pero tambe pa Santa Rosa, WEB y RWZI (Rioolwater zuiveringsinstallatie) como e servicio cu ta procesa awa di riolering na Aruba. E instancianan aki lo bay traha mas cerca cu otro pa fortifica e vigilancia y monitor e calidad di e diferente tiponan di awa. Nan lo percura pa sigui mantene e standardnan y si den caso algo pasa nan mester tin tur protocol pa atende den un forma eficiente cualkier situacion indesea cu presenta of calamidad cu lo por sosode relaciona cu awa”.

Pa e reunion aki DVG a trece dos experto internacional, Teofilo Montero, coordinador di ekipo tecnico regional di saneamento di PAHO (Organizacion Pan Americano di Salud) y WHO (Organizacion Mundial di Salud), como tambe Marian Mesker experto di test awa di Laboratorio Nacional di Merca.

Teofilo Montero a splica cu el a bin Aruba riba peticion di Ministerio di Salud Publico pa evalua y busca con pa mehora e calidad di awa potabel y awa pa irigacion. “Aki nos ta analisa con por mehora e calidad di awa cu ta uza na Aruba. E calidad di awa na Aruba ta hopi bon. A haci un inversion significativo pa garantisa un calidad di awa cu hopi pais lo gusta di tin. Mi ta contento di por a constata awa di e calidad aki na Aruba”, asina e experto internacional a bisa.

Marian Mesker den su capacidad di test awa, a bisa cu el a bin Aruba pa consulta cu WEB Aruba NV riba e resultadonan fisico-kimico… “y e siguiente paso ta pa tuma algun muestra. Mi ta trahando cu WEB Aruba pa hopi aña caba. Nos a yega di test e awa di WEB caba. Mi impresion ta cu e calidad di awa aki ta basicamente awa di boter saliendo for di cranchi. Asina ta e ta hopi bon”, e experto a afirma.

“Aruba ta un luga hopi bunita pa bishita, cu un clima increibel y un calidad di awa hopi bon”, asina Marian Mesker a conclui.

- Advertisement -

DUNA COMENTARIO

Please enter your comment!
Please enter your name here