Home General Pueblo a braza e sentimentonan di patriotismo y nacionalismo

Pueblo a braza e sentimentonan di patriotismo y nacionalismo

3
0
SHARE
- Advertisement -

Prome Minister:

ORANJESTAD(AAN): Aruba a celebra dia Nacional diasabra. Por a mira diabierna un union riba Plaza Padu, manera ta henter Aruba a uni.

Prome Minister Mike Eman a comenta cu e empeño grandi pa e ultimo añanan tabata pa por profundisa e sentimentonan di patriotismo y nacionalismo den nos pais caminda cu enfoke ta e herencia bunita cu nos a haya di nos antepasadonan y tum’e den un contexto politico, cultural, arte, obranan, tur e logronan di nos pais, pone cada un den e contexto di e fundeshi cu nos kier crea pa e sentido di patriotismo na Aruba.

Ora cu esancha e base cu ta e fuente di reflexion y e fuente tambe di inspiracion pa motibo pa cual ta sinti e amor pa nos pais, e stimacion pa nos pais, ta incorpora automaticamente hopi mas persona cu ta identifica su mes, sea cu educacion, politica, arte, cultura y ta mira cu den e dianan aki cu a duna un atencion special na e 2147 firmante, cu ta cubri henter Aruba

Naturalmente nan lidernan politico, Henny Eman, Juancho Irausquin, Shon A. Eman, Betico Croes, hunto cu nan semper tabata tin un pueblo. E pueblo cu a marcha cu nan, e pueblo cu a desaroya e cancionnan cual nan a marcha, lucha y guia y inspira e pueblo. E pueblo cu a crea e obranan cu cual nos a duna servicio, cu cual a trece pueblo hunto, sea cu ta den e edificionan monumental di pais Aruba, den cual servicio a worde duna, of school a worde duna of simbolonan di nos identidad di e forma di nos casnan Arubiano.

Ora cu esancha e base riba cual bo ta construi e sentido di patriotismo, e sentido cu Aruba tin e capasidad pa supera den pasado y pa conkista den futuro, e ora ey bo ta mira e resultado cu a haya diabierna anochi, caminda pueblo realmente a bin hunto. Un sentido grandi di aprecio pa locual nos antepasadonan a haci pa nos, pero tambe cu un sentido grandi di optimismo.

Mey mey di plaza Padu, a worde brasa door di edificionan cu a worde restaura durante e ultimo añanan, cu ta simbolo di un vision di unda kier hiba Aruba. No mas laga nos pais, nos edificionan, nos calidad di bida den ruina. Ban construy’e, ban renobe. Esey tabata e atencion di e ultimo 8 añanan. Na momento cu a cuminsa restaura identidad Arubano, restaura e aspiracionnan di e pueblo y e optimismo di nos comunidad, den e dianan aki tur a bin hunto.

Manera cu a comparti riba Plaza Libertador Betico Croes, casi por mishi cu e sentido di historia awo. E ta asina bibo na e momentonan aki pa e forma con a braza e dianan nacional, e forma con a habri e atencion cu a duna na tur aspecto di e construccion di pais Aruba, a duna un dimension totalmente nobo na e forma con nos por sinti nos mes orguyoso, los di cualkier sentimento politico, pero basa riba e stimacion pa Aruba, manera cu Padu, Rufo Wever y Lio Booi a skirbi’e tambe, cu e amor ey no tin nada pa kibr’e.

Nan a inculk’e den nos curason. Cu e sentimento ey a desaroya e partinan di mas bunita di nos pais y cu e sentimentonan ey ta carga e vision ey tambe pa e futuro di Aruba y esaki ta algo cu nos por a sinti hopi cla den e dianan aki, den e alegria cu tin den e pueblo Arubano, segun prome minister.

 

- Advertisement -

DUNA COMENTARIO

Please enter your comment!
Please enter your name here