Temblor di Diabierna mainta a bira e di tres registra e siman aki

Publication: Saturday, 11 March 2017. Categoria: General

ORANJESTAD (AAN): En total, Aruba a sinti e siman aki 3 temblor, y cada uno tabatin nan epicentro na casi mesun lugar.

Aunke algun persona ta bin cu teorianan eroneo cu e ta debi na exploracion di gas of petroleo, hecho ta cu net na e area ey tin nada di esey ta pasando.

Mas bien e temblor ta socede net riba un fractura cu pa hopi decada caba ta conocipa cientificonan.

E prome temblor a keda registra Diamars 7 di Maart 2017 pa 1:23 am. Su epicentro tabata na 12.00ºN y 69.68ºW, y tabatin magnitud di 3.1º riba Scala di Richter.

E di dos temblor a worde sinti Diahuebs 9 di Maart 2017 pa 9:29 am. Su epicentro tabata na 12.01ºN y 69.67º W, y tabatin magnitud di 4.1º riba Scala di Richter.

Esun di Diabierna 10 di Maart 2017 pa 9:46 am, tabatin su epicentro na 12.17ºN y 69.67ºW. Esaki ta como 35 kilometer Zuid-Oost di Baby Beach na San Nicolas, Aruba.

E epicentro tabata mas cerca di superficie. E tabatin un profundidad di 15.9 km. Despues di revision, su magnitud a worde stipula na 4.7º riba Scala di Richter.

Na Aruba el a worde sinti basta fuerte, aunke ningun informe a drenta di daño material. Si acaso di berdad e tabata na 5.5º magnitud (manera señala na comienzo), e destruccion cu e a laga atras ta mucho mas grandi.

Esnan cu tabata na Dr. Horacio Oduber Hospital (cu ta keda 59 km leu di epicentro), a sinti full e edificio move, y a spanta hopi hende.

Na Curaçao tambe el a worde sinti hopi. Riba Social Media a circula un potret di mercancianan cu a sali cay den negoshi di Building Depot (cu ta keda 82 km leu di epicentro).

One Response to 'Temblor di Diabierna mainta a bira e di tres registra e siman aki'

  1. March 11, 2017 at 5:18 pm
    Tico

Leave a Reply